«Abai CUP 2024» республикалық пікірсайыс турнирі өтуде

Абай облысының ішкі саясат басқармасының әлеуметтік тапсырысы аясында Абай облысының әкімінің кубогына арналған «Abai CUP 2024» республикалық пікірсайыс турнирінің ашылу салтанаты өтті, – деп хабарлайды Semeynews.kz.

Ашылу салтанатында Абай облысының Ішкі саясат басқармасы басшысының орынбасары Назерке Аққожина қатысушыларға сәттілік тіледі.

«Бүгін зияткерлігімен, тапқырлығымен, білім-біліктілігімен дараланған, жүздік жүйрік шыққан 32 пікірсайысшылар командасы бақтарын сынайтын болады.
Пікір сайыс ойындарына қатысып, жинаған тәжірибелеріңіз арқылы сіздер тек белгілі бір өңірдің ғана емес, жалпы қоғамның дамуына үлес қосасыздар, десек артық емес. Олай болса, сәттілік серік болып, жеңіс тұғырынан көрінулеріңізге тілектестігімді білдіремін. Абай елінде өтетін екікүндік білім бәйгесі тек жарқын сәттермен есте қалсын»,- деді Назерке Аққожина.

Турнирде еліміздің 8 аймағынан 32 команда бақ сынайтын болады.

Турнир төрешілері Назарбаев университетінің «Номад» дебат клубының мүшесі – Заманбекова Алтынай, Шәкәрім университетінің «Парасат» дебат клубының түлегі – Тұрсынбаева Аяулым және «Білгенге маржан» қоғамдық қорының атқарушы директоры Өмірәлінов Ерасыл.

Айта кету керек, республикалық пікірсайыс өңірімізде дәстүрлі түрде екінші рет өткізілуде. Бүгінде Абай облысы бойынша студенттік лига құрамында 500-ге жуық пікірсайысшы және 8 пікірсайыс клубы бар.

Semeynews.kz