Мемлекет басшысы Қасым-Жомарт Тоқаевтың Жарлығымен 3477 әскери бөлімінің атқышы ефрейтор Тілек Құмарбеков «Ерлігі үшін» медалімен наградталды, – деп хабарлайды Semeynews.kz.
ҚР ҰҰ«Шығыс» өңірлік қолбасшылығының баспасөз қызметінің хабарлауынша, Ұлттық ұландыққа мемлекеттік награданы Ішкі істер министрі полиция генерал-лейтенанты Ержан Сәденов республика күніне орай ұйымдастырылған салтанатты шарада өз қолымен табыстады. Әскери қызметші Үлбі өзеніне шомылып жүрген алты жасар баланы ажал ауызынан алып қалған болатын.
Еске салайық, оқиға 2022 жылдың 16 шілдесінде Тарханка ауылының маңындағы Үлбі өзенінде орын алған. Су иірімімен ағып бара жатқан қаршадай баланы көрген әскери қызметші құтқаруға дереу ұмтылады. Ағынды суға батып бара жатқан бүлдіршінді көзсіз ерлік танытып, жағаға аман-есен алып шыққанымен, ефрейтердің өзі жан дәрменінен айырылады. Медициналық көмекке мұқтаж болған жауынгер тек аурухана есін жиып үлгереді.
Semeynews.kz
