Семейдегі аспалы көпірдің пайдалануға берілгеніне 22 жыл толды

2000 жылдың 17 қазанында Семей аспалы көпірі пайдалануға берілді. Ертіс өзені арқылы өтетін аспалы көпірдің жобасын жапондық “Исикаваджима-Харима Хеви Индастриз Компания”компаниясы ұсынған болатын, – деп хабарлайды Semeynews.kz.

Көпір құрылысы  Үкіметтің 1998 жылғы 24 қаңтардағы қаулысымен басталды.

Ұқсас көпірлер тек АҚШ, Оңтүстік Корея, Түркияда салынған.

Семей мақтанышы болып табылатын аспалы көпір ТМД-дағы жалғыз көпір болып табылады және әлемде 17-ші орында. Бұл оң және сол жағалауды байланыстыратын ерекше құрылыс нысаны. Аспалы өткел жер сілкінісіне төзімді. Көпірдің кеңістіктік ұзындығы – 750 метр, ал жалпы ұзындығы – 1086 метр. Ені -35 метр, биіктігі-90 метр.

Жапондық компаниямен бірге “Алсим Аларко” түрік фирмасы да жобада жұмыс істеді, олар ұзындығы 16 шақырым болатын кірме жолдарды салумен айналысқан. Жол жамылғысы – Тринидад көлінен арнайы тапсырыс бойынша әкелінген табиғи асфальт. Көпірдің басқа көпірлерден жалғыз айырмашылығы – жол бетіне табиғи асфальт төселген.

Жоспар бойынша көпірдің құрылысы 42 айға есептелген, алайда нысан мерзімінен бұрын аяқталып, 2000 жылдың 17 қазанында пайдалануға берілген.

Semeynews.kz