Тәуелсіздік шежіресі. Жасампаздықтың әр жылы: 2010 жыл – ЕҚЫҰ төрағалығы мен Астана Саммиті ел мерейін асырды

Бір сөзбен айтқанда, Азияның айбынды мемлекетіне айналу үшін, ынтымақ-бірлігі жарасқан, еңсесі биік, тұғыры мықты мемлекет құру үшін, тұтас бір ел болып даму жолында серпінді секіріс жасау үшін әуел бастан ұлттық символы ретінде әрі киелі, әрі батыл, әрі шапшаң, әбжіл қимылдайтын – барысты таңдап алған Қазақ елі үшін Барыс жылы басқа жылдарға қарағанда есте қаларлықтай оқиғаларымен ерекшеленді.

2010 жылы әлемдік саясатта айымыз оңынан туып, ЕҚЫҰ секілді жаһандағы айбарлы да алпауыт ұйымға төрағалық тізгінін қолға алды. Төрағалықты лайықты өткеріп қана қоймай, тың бастама – Астана Саммитін абыроймен атқару арқылы әлемге тағы бір қырымыздан танылдық.

Сөйтіп 2010 жылдың басты саяси оқиғасына көшсек, Қазақстан халықаралық саясатта мемлекеттің беделін асырған, абыройын асқақтатқан іргелі істерді тындырды. Беделі жағынан Біріккен Ұлттар Ұйымынан кейінгі орында тұрған Еуропадағы қауіпсіздік пен ынтымақтастық ұйымындағы Төрағалық миссиясын абыроймен атқарып шықты. Ванкуверден Владивостокқа дейінгі аумақты алып жатқан Ұйымға Орталық Азия аумағында ғана емес, ТМД елдерінің ішінен, одан қала берді ислам дінін ұстанушы мемлекеттердің арасынан бірінші болып басшылық жасадық. Сөйтіп, Қазақстан Еуропаның төріндегі 56 мемлекеттің атынан төбе би болып төрелік айтты, қауіп-қатерлерге толы 21-ғасырдағы өңірлік һәм жаһандық деңгейдегі қауіпсіздікті қамтамасыз ету ісіне сүбелі үлес қосты. Астанада ЕҚЫҰ-ның Саммитін өткізіп, берекесі шашырап бара жатқан Ұйымның жұмысына тың серпін берді, бойына қан жүгіртті. Сондықтан да, Барыс жылындағы басты табысымыз ретінде – ел мерейін өсірген ЕҚЫҰ-дағы төрағалығымызды һәм Астана Саммитін айтуға болады. Бұл осы 2010 жылдың еншісіндегі елеулі оқиға ғана емес, Қазақ тарихындағы елдің абыройын асқақтанатын ұлы істердің бірі болатын. Қазақстан 2010 жылдың басында ЕҚЫҰ тізгінін ұстасымен Төрағалықтағы нақты ұстанымдарын «тайға таңба басқандай» етіп «төрт -«т» ұранымен белгілеп алды. Сөйтіп төрағалық аясындағы табанды жұмыстар «Сенім. Дәстүр. Ашықтық. Төзімділік» атты ұранмен өрбіді. Айта кетерлігі, ЕҚЫҰ төрағасы болғанға дейін Ұйымға мүше әрбір мемлекеттің Қазақстанды қолдауы аса маңызды болды. Ал төрағалық барысында Қазақ елі ЕҚЫҰ-ға қатысушы һәм серіктес мемлекеттердің сенімін толықтай ақтады. Бұлай деуіміздің өзіндік себептері бар. Оның айқын бір дәлелі – ЕҚЫҰ-ның Іс басындағы төрағасы ретінде Қазақстан 2010 жылдың сәуірінде Қырғызстанда болған саяси жағдайды реттеу ісіне айрықша үлес қосты. Қазақстанның қабылдаған шараларының арқасында айыр қалпақты ағайынның елінде азаматтық соғысқа жол берілмеді, нәтижесінде ол елде құқықтық алаңда жұмыс істейтін билік жүйесі қалыптасты. Екіншіден, Қазақстан Астанада ЕҚЫҰ-ның Саммитін өткізді, әлемдік қауіпсіздікті қамтамасыз ету бағытындағы батыл да өміршең ұсыныстарын айтты, сөйтіп айдай әлемге Еуразия құрлығын ен жайлап жатқан барыс мінезді халықтың дархандығын һәм іскерлігін паш етті. Осылайша Қырғызстандағы жағдайға қатысты Қазақстанның қабылдаған шаралары ЕҚЫҰ-ның Іс басындағы төрағасының араағайындық пен салмақты халықаралық саясатындағы абыройын асқақтатты. Ал Астана Саммиті жыл бойғы төрағалықтың жемісті қорытындысы болды. Осылайша Қазақстан 2010 жылы ЕҚЫҰ-ға төрағалық етіп қана қоймай, Астана Саммитін өткізу арқылы әлемдік қауіпсіздікті қамтамасыз етуге мол үлес қосты. Қазақ елінің төрағалы­ғы­нан кейін қауіпсіздік пен ынтымақ­тастық бұ­рын­ғыдан әлдеқайда ауқым­ды, мұ­хиттан мұ­хитқа дейінгі шексіз аумақ­ты қамтып, жаңа деңгейде қадам басатын болды. Беделді ұйымның бүгінгі төрағасы Литва Республикасы да Қазақстанның бастамаларына үлкен баға беріп, ізгі дәстүрді жалғастыру ниетін танытқан болатын. Бұл ретте Литва Президенті Даля Грибаускайте: «Қазақстанның тамаша елордасы Астанадағы ЕҚЫҰ Саммитінің достық атмосферасы және қабылданған шешімдер Ұйымға мүше барлық елдердің, сондай ақ екі елдің арасындағы қарым-қатынастарды одан әрі дамыту үшін мықты іргетас болатынына сенемін. Литва Қазақстаннан төрағалық тізгінін қабылдай отырып, Сіздер тарапынан берілген төрағалықтың жоғары стандарттарын сақтайтын болады», – деп атап көрсеткені есімізге түсіп отыр. Қалай десек те, сайып келгенде Қазақстанның ЕҚЫҰ-ға төрағалығы және Астана Саммиті адамзат баласының қауіпсіздігін қамтамасыз ету және өркениеттер диалогын дамыту ісіне қосылған жиырма бірінші ғасырдың басындағы ең сүбелі үлес болды. Сөйтіп, Саммит арқылы әлемдік қоғамдастықтың көзі Қазақ елінің ынтымағы жарасқан, бірлігі баянды мемлекет екендігіне, ал қазақ ұлтының тумысынан дарында ұлт екендігіне тағы бір мәрте жете түсті.

Жалпы дағдарыстан кейінгі кезеңдегі даму жолын айқын бағдарлап алған еліміз 2010 жылы да экономика саласында толайым табыстарға қол жеткізді. Осы жылы жұмысын бастаған Кеден одағын сарапшылар «ТМД аясында қалыптасқан экономикалық бірлестіктер мен интеграциялық үрдістердің ең дамыған түрі» деп атай бастады. 170 млн. адам тұратын нарықты қамтитын Кеден одағының келешегі бар құрылым екендігіне аз уақыттың ішінде көпшіліктің көзі жетті.

2010 жылы қолға алынған басты жобалардың бірі – 2010-2014 жылдарға арналған Үдемелі индустриялық-инновациялық дамудың мемлекеттік бағдарламасы. Бағдарлама аясында республикалық және өңірлік деңгейдегі индустрияландыру карталары әзірленіп, ол екі кезең бойынша жүзеге аса бастады. 2010 жылдың бірінші жарты­жыл­дығында жалпы құны – 380 миллиард теңгеден асатын 72 ірі өндіріс нысаны пайдалануға берілді. Ал жыл соңына таман жалпы құны – 450 миллиард теңгеден асатын 80 ірі инвестициялық жоба іске қосылды. Осылайша бір ғана жыл ішінде республикамызда жалпы құны – 800 миллиард теңге болатын 152 ірі индус­триялық-инновациялық өндіріс орындары іске қосылды.

Қазақстан Үкіметі тарапынан жүйелі жүргізілген жұмыстардың арқасында 2010 жылды табысты аяқтады. Жыл қорытындысына сәйкес, ел экономикасы­ның қозғаушы күшіне айналған барлық негізгі салаларда өсім байқалған. Қысқа мерзімді экономикалық индикатор 2009 жыл­мен салыстырғанда 107,2 пайызды құрады. Жыл басынан бері экономиканың өсімінің тұрақты қар­қыны сақталды.

Жалпы алғанда әлемдік саясатта ғана емес, экономикадағы жетістіктердің өзі бір төбе болса, мәдениетімізде де, әдебиетімізде де ұлт болып әспеттейтін, халық болып дәріптейтін толымды дүниелер молынан болды. Спортта да мықтылардың мықтысы санасатын күшті мемлекет екенімізді дәлелдедік. Сонымен…

2010 жылы:

2010 жылдың қаңтарынан Кеден одағы іске кірісті

– 14 ақпан – ҚР Президенті Н.Ә.Назарбаев Мәскеуге жұмыс сапары барысында Ресей Президенті Дмитрий Медведевпен кездесті. Медведев өз кезегінде ЕҚЫҰ сам­митін Қазақстанда өткізу туралы бастамаға қол­дау білдірді;

– 19-17 наурыз – Елбасы Нұрсұлтан Назарбаев Өзбекстан Республикасының Президенті Ислам Каримовтың ресми шақыртуымен Ташкентке бар­ды;

– 7 сәуір – Ақордада Мемлекет Басшысы Нұрсұлтан Назарбаев Қазақстанға ресми сапармен келген БҰҰ Бас Хатшысы Пан Ги Мунмен кездесті. Кездесу барысында Бас Хатшы Елбасына ядролық қарудан өз еркімен бас тартып, оны Қазақстан аума­ғынан шығартқаны үшін тағы да алғысын білдірді. «Біз сіздің Қазақстанның ядролық қаруды жасау және таратпау бағытында жасаған әрекеттерін жоғары бағалайтыныңыз үшін алғысымызды білдіреміз. Біздің ядролық қаруды таратпау ісіне қосқан үле­сімізді былтырғы жылдың желтоқсан айында АҚШ пен Ресей лидерлері де бірлесе жасаған мәлімде­мелерінде атап өтті. Ядролық қарудан қатты зардап шеккен және одан өз еркімен бас тартқан ел ретінде Қазақстан басқа мемлекеттерді де одан бас тартуға үнемі шақырып отырады», – деді Президент;

-11 сәуір – «Блэр Хаус» ресми резиденциясында Қазақстан Президенті Нұрсұлтан Назарбаевтың Америка Құрама Штаттарының Президенті Барак Обамамен кездесуі болып өтті. Кездесу барысында Нұрсұлтан Назарбаев АҚШ Президентінің Ядролық қауіпсіздік жөніндегі ғаламдық саммитті шақыру, Ресеймен Стратегиялық шабуылдық қару-жарақ (АҚШ) тура­лы жаңа шартқа қол қою, АҚШ-тың жаңа ядролық стратегиясын қабылдау сияқты ядролық қарусыз әлем қалыптастырудағы үлкен қадамдарға себеп болған халықаралық қауіпсіздік саласында­ғы бас­тамаларын және жетістіктерін айрықша атап өтті. Кездесуден кейін Президенттердің бірлескен мә­лімдемесі жарияланды. Онда екі ел басшысы да яд­ролық қарусыз тіршілікті таңдайтыны айтылған. «АҚШ Қазақстан Президентіне ядролық қару­сыз­дану және қауіпті қаруды таратпауға қосқан үлесін ерекше атап өтті», – деп атап көрсетілген мәлім­демеде. Сондай-ақ АҚШ Президенті Б.Обама ха­лық­аралық ядролық отын банкін орналастыру туралы ұсынысы үшін қазақстандық әріптесіне алғыс ­білдіріп, Қазақстанның МАГАТЭ директорлар ке­ңесінің мүшелігіне кіруге деген талпынысын қуат­тады;

– 21 сәуір – Мемлекет Басшысы Нұрсұлтан Назарбаев Корея Республикасына мемлекеттік сапармен келді. Мемлекеттік сапар Қазақстанның Корея Респуб­ликасындағы жылының салтанатты ашылу рәсімінен басталды. Шараға Корея Республикасының Пре­зиденті Ли Мен Бак қатысты;

– 25 мамыр – Елбасы елімізге ресми сапармен келген Түркия Президенті Абдулла Гүлмен келіссөз жүргіз­ді. Ақордадағы келіссөздер кезінде Қазақстан Президенті Нұрсұлтан Назарбаев Түркиямен экономикалық ынтымақ­тастықтың жаңа тұрпатты арнайы бағдарламасын түзуді ұсынды. Елбасы оған ерекше атау да әзірлеп қойыпты, жаңа қазақ-түрік экономикалық бағ­дар­ламасы «Жаңа синергия» деп аталмақ. Бір қызығы, «синергизм» (грекше, «syn» бірге, «ergos» әрекет ете­тін) сөзі биологияда ағзалардың бірлесе және бір­текті қызмет етуін білдіреді екен. Яғни одақтас мемлекеттердің ара қатынасын бейнелі айшықтауда таптырмайтын саяси термин. Мұнда ол іс-қимылдың негізгі үш үдерісін – дұрыс жоспарлауды, озық білім мен жедел ақпаратты тиімді алмасуды және ағым­дағы жұмысты үйлестіруді білдіреді. «Қазақстан – тек қана Азияның жүрегі емес, ол сондай-ақ осы аймақтың маңдайындағы жарқыраған жұлдызы! Мұны тек Қазақстан ғана мақтан тұтпайды, мұны біз – Түркия да мақтан тұтамыз! Біз сіздердің елдеріңізде бұдан да көп жұмыс істеуге, ендігі игерген салалардан ғана емес, жаңаларында да бұдан да көп жобаны жүзеге асыруға құлықтымыз!», – деді Түр­кия Басшысы Абдолла Гүл;

– 8 маусым – Мемлекет басшысы Нұрсұлтан Назарбаев, Азия­дағы өзара ықпал­дастық және сенім шаралары жөніндегі кеңесінің Іс басындағы төрағасы ретiнде Ыстам­бұлда басталған Азия кеңесінің ІІІ Саммитінде сөз сөйлеп ашты. Елбасы осы жолы тағы бiр бастама көтерiп: ЕҚЫҰ – Азия Кеңесi форумын құруды ұсынды. «Бұл екi ұйымның ынтымақтастығы мен әрiптестiгi Азия құрлығындағы қауiпсiздiк платформасын қалыптастыруға жол ашуы тиiс», – дедi Назарбаев;

– 11маусым Елбасы Нұрсұлтан Назарбаев Ташкентте Шанхай ынтымақтастық ұйымына мүше-мемлекеттер басшыларының кезекті саммитіне қатысып, сөз сөйледі. «Шанхай ұйымын құрудағы бас­ты мақсаттардың бірі – 2002 жылы 7 маусымда қол қойылған ұйымның Хартиясына сәйкес, өзара сенім мен достықты, тату көршілік жағдайды нығайту, саяси, сауда-экономикалық, ғылыми-техникалық, мәдени, білім беру, энергетикалық, көліктік, экологиялық және басқа да салалардағы тиімді ынтымақтастықты дамыту көзделген. Бүгінде саммиттің негізгі міндеті өңірдегі бейбітшілікті, тұрақтылықты, қауіпсіздікті ұстап тұру, сауда-эко­номикалық және мәдени-гуманитарлық ынты­мақтастықты дамыту болып табылады. Әлемдегі энергоресурстардың тапшылығы ШЫҰ-ның энер­гетикалық қоғамдастықты құруына түрткі болуы тиіс. Бұл қоғамдастықтың аясында энергоре­сурс­тарды өндірушілердің, тасымалдаушылардың және тұтынушылардың стратегиялық мүдделерін үй­лес­тіретін боламыз. Трансқұрлықтық автокөлік ин­фрақұрылымын белсенді дамытып отырған Қа­зақстан ШЫҰ-ға мүше мемлекеттердің үкіметтері арасындағы Халықаралық автомобиль тасымалдары мен оның қосымша бөлшектері үшін қолайлы жағдай жасау туралы келісімді келісуді шапшаң­датуды ұсынады», – деп Елбасы өзге де әріптестеріне ұсыныс айтты;

– 29 маусым – Бейбітшілік және келісім сарайында Мемлекет басшысы Нұрсұлтан Назарбаевтың қатысуымен толеранттық және кемсітпеушілік жөніндегі ЕҚЫҰ-ның жоғары деңгейдегі конференциясы болып өтті. «Мәселенің мәні құны өте жоғары адам өміріне байланысты. ЕгерЕҚЫҰ-ның халық арасындағы миссиясы осы проблеманы шешудегі қосымша күшке айналатын болса, онда бұл әлемдік оң жағдайға ұйымның қосқан ең маңызды үлесі болары анық», – деді Президент Н.Назарбаев. Сондай-ақ, ол ХХІ ғасырдың соңғы өткен онжылдығы мен алғашқы онжылдығы то­ле­рант­тық ұғымына, ең бастысы, ЕҚЫҰ кеңістігіндегі нақты саясатқа едәуір өзгерістер алып келгенін айтты. Жиын барысында Мемлекет басшысы Қазақстан ЕҚЫҰ-ға төрағалық етуші ел ретінде ұйымның бар­лық аумағында толеранттық, этносаралық бей­біт­шілік және конфессия аралық келісім идеясын алға жыл­жытуға өз үлесін қосуға шын ниеті­мен күш са­латынын жария етті;

– 17 шілде – Мемлекет басшысы Нұрсұлтан Назарбаев ЕҚЫҰ-ға мүше мемлекеттердің Сыртқы істер министрлерінің Алматыдағы бейресми кездесуіне қатысты.«Лаң­кестік, аштық, кедейшілік, экологиялық апаттар, эпидемиялар, ұлтаралық және дінаралық қақтығыстар – бүгінгі адамзат баласының бас қосып шешер, алдыңғы қатардағы түйткілді мәселесі. Бұлармен күрес жүр­гізу ЕҚЫҰ сияқты қызмет аясы көпқырлы және беделді институттардың бар күш-жігерін жұмсауын қажет етеді. Сондықтан бүгінгі саммитті өткізу – тұ­тастай алғанда адамзат үшін ма­ңызды» – деді Елбасы өз сөзінде;

– 4 тамыз – Ақордада Мемлекет басшысы Нұрсұлтан Назарбаев азаматтардың құқын қорғаудың өзекті мәсе­лелеріне арналған жиын өткізді. Басқосуға Премьер-Министр К.Мәсімов, Мемлекеттік хатшы – Сыртқы істер министрі Қ.Саудабаев, Президент Әкімшілігінің жетекшісі А.Мусин, Бас Прокурор Қ.Мәми, Жоғарғы сот төрағасы М.Әлімбеков, Ішкі істер министрі С.Баймағанбетов, Экономикалық және сыбайлас жем­қорлыққа қарсы күрес агенттігінің төрағасы Қ.Қо­жамжаров және құқық қорғау орындары мен мем­лекеттік органдардың басшылары қатысты. Жиын барысында азаматтардың жеке ісі, мәселен үлескер­лердің тағдыры, қылмысқа қарсы күрес, заңдылықты сақтау мен құқық бұзушылықты болдырмау, азаматтардың кәсіпкерлік құқын сақтау секілді мәселелер талқыланды;

– 20 тамыз – Президент Нұрсұлтан Назарбаев Армения астанасы – Ереванда өткен Ұжымдық қауіпсіздік туралы шарт ұйымына мүше-елдер Мемлекет басшыларының бейресми саммитіне қатысты;

– 14 қыркүйек – Мемлекет басшысы Нұрсұлтан Назарбаев Украи­наға ресми сапармен барды;

– 25 қазан – Мемлекет басшысы Нұрсұлтан Назарбаев НАТО-ның Бас хатшысы Андерс Фог Расмуссенмен кездесті. «Солтүстік­атлантикалық Альянспен арамыздағы қарым-қатынас жемісті дамып келе жатқандығын айта кеткім келеді. Қазақстан НАТО-ның Парламенттік Ассамблеясына бақылаушы ретінде қатысады. Былтырғы жылдың маусым айында посткеңестік кеңістік аумағында НАТО Солтүстік­атлантикалық әріптестік кеңесінің форумын өт­кіз­ді»,- деді Н.Назарбаев кездесу барысында. Андерс Фог Расмуссен Қа­зақ­стан мен НАТО арасындағы ынтымақтастық Қарулы Күштер мен әскери саланы реформалау, төтенше басқару мен ғылыми ынтымақтастық сияқты салаларда белсенді түрде дамып келе жатқандығын тілге тиек етті;

– 12 қараша – Елбасы Нұрсұлтан Назарбаев Ұжым­дық қауіпсіздік шарты ұйымының бас хатшысы Николай Бордюжаны қабылдады. Бордюжа Президентке биыл­ғы жылғы 10 желтоқсанда Мәскеуде өтетін ҰҚШҰ ұжым­дық қауіп­сіздік кеңесінің отырысына әзірлік барысы туралы айтты. Кездесу барысында Н.Бордюжа Қа­зақстанның ЕҚЫҰ-ға төрағалығына жоғары баға берді;

– 18 қараша – Президент Нұрсұлтан Назарбаев Каспий маңы елдері мемлекет басшыларының үшінші саммитіне қатысу үшін Бакуге сапармен барды;

– 1 желтоқсан – Тәуелсіздік сарайында Қазақстан Президенті Нұрсұлтан Назарбаев ЕҚЫҰ-ның Астана Саммитінің отырысын ашты. ЕҚЫҰ-ның соң­ғы саммиті осыдан 11 жыл бұрын Ыстам­бұл­да өткен екен. Содан бергі кезеңде дүниенің төрт бұрышында болған және болып жатқан әрекеттер, адамзаттың қауіпсіздігіне қатер төндіретін қауіп-қатерлер ЕҚЫҰ-ға мүше елдердің басшыларын бір үстелдің басында шүйіркелесуге итермеледі. Алайда түрлі себептермен алқалы басқосулар өтпей келген-ді. Бұндай сәтті бастаманы Қазақстан көтеріп, төрағалық тұсында тиімді жүзеге асыра білді. Расында, ЕҚЫҰ-ның Астана Саммиті Қазақстан үшін ғана емес, әлемдік қауымдастық үшін де елеулі оқиға болды. Өйткені төрткүл дүние үшін аса өзектіге саналатын өңірлік қақтығыстардың баршасы ЕҚЫҰ шеңберінде сөз болды. Саммитке қатысқан жоғары деңгейдегі тұлғалар «мемлекеттер өзара түсінісіп, қатерлермен бірлесе күресуі керектігіне» барынша назар аударды. Мемлекет басшысы Н. На­зарбаев Астана Саммитінің ашы­луы барысын­да әлем алдындағы аса үлкен жауапкершілікті сезіне тұрып, салтанатты түрде байырғы қазақ жерінде, Қазақстанның елордасы – Астанада, Еуразияның жүрегінде, мыңжылдықтар бойы адамзат тарихын жасаған ұлы ха­лықтардың диалогы басталғанын қадап тұрып айтты. «Бұл біздің халық­тарымыздың қауіпсіздігі мен гүл­дену ісіне қосылған үлкен ұлы үдеріс. Алып Еуразия құрлығын «Сенім. Дәстүр. Ашық­тық және Төзімділік» сын­ды жал­пы құн­дылықтарға негізделген ор­тақ ке­ңіс­тікке айналдыру өз қолы­мызда. Біздің Саммиттің тарихи маңызы мен ат­қарар жүгі де осында деп білемін», – деп атап көрсетті Н. Назарбаев. Саммитке барлық құр­лықтан – Еуропа мен Азиядан, Сол­түстік Америка мен Австралиядан 75 елдің делегациясы қатысты. Оның ішінде елордамыз 5 мыңнан астам шетелдік қонақтарды және 1,5 мыңнан астам қазақстандық және халықаралық бұқаралық ақпарат құралдарының өкілдерін қабылдады. Саммит арқылы Қазақстанды танитындар елімізді жаңа қырынан біле түсті, ал елге алғаш аяқ басқандар дархан даланың ұлылығын сезініп, ұлтымыздың ұстынына куә болды. Бұл басқосудың ең басты нәтижесі – Астана декларациясының қабылдануы болды. Декларацияда ЕҚЫҰ-ның барлық нормалары, қағидалары мен міндеттемелері көрсетіліп, оның ауқымы мен аумағы да кеңейтіліп, қайта қуатталды. Бұндай декларацияны беделді сарапшылар Ұйымның келешектегі жұмысына ерекше серпін беретін құжат ретінде мойындауда. «Декларация – еуразиялық және еуро­атлантикалық қауіпсіздікті қамтамасыз етудің біртұтас және бө­лінбес кеңіс­ті­гіндегі жаңа кезеңнің бастауы болуы мүм­кін. Астана Сам­митінің табысы бұл бүкіл ЕҚЫҰ-ға қа­тысушы мемлекет­тер­дің табысы болып табылады», – деп атап көрсетті Елбасы Саммиттегі қорытынды сөзінде;

– 9 желтоқсан – Кеден одағының Жоғарғы органының отырысы барысында Қазақстан Президенті Нұрсұлтан Назарбаев, Беларусь Президенті Александр Лукашенко, Ресей Президенті Дмитрий Медведев, Беларусь Республикасы, Қазақстан Республикасы және Ресей Федерациясы арасында Бірыңғай экономикалық кеңістік құру жөніндегі Декларацияға қол қойды.«Біз Біртұтас экономикалық кеңістік 2012 жылдың 1 қаңтарынан бастап өз күшіне енетінін бекіттік және оған басқа елдердің де енуіне жол аштық. Ол бізді Еуразиялық экономикалық одақ құруға жақындата түседі,» – деді осы мәселеге байланысты сөзінің соңында Қазақстан Президенті;

– 9-10 желтоқсан – Қазақстан Президенті Нұрсұлтан Назарбаев ЕурАзЭҚ, ТМД және ҰҚШҰ-ның іс-шараларына қатысу мақсатымен Мәскеу шаһарына ресми сапармен барды. Мемлекетаралық кең­естің жалпы жұмысына баға берген Нұрсұлтан Назарбаев: «Біз Қоғамдастықтың, Кеден одағының және Бірыңғай экономикалық кеңістіктің негізгі даму бағыттары бойынша көптеген мәселелерді тал­қы­ладық. Небәрі 10 жылдың ішінде біз көп нәрсеге қол жеткізіп отыр­мыз. ­ЕурАзЭҚ-тың толық бесжақты құрамдағы мәжілісінің қорытындысына келер болсақ, онда да біз маңызды құжаттар қабылдадық. Атап айт­­қанда, шаруашылық субъектілерінің ЕурАзЭҚ Сотына шағымдану реті туралы келісімшартқа қол қойылды және 2011-2013 жыл­дарға белгіленген іс-шаралар бекітілді», – деді;

– 23 желтоқсан – Өскемен қаласында Тұңғыш Президент – Елбасы Н.Ә.Назарбаевтың өкілеттігін 2020 жылдың 6 желтоқсанына дейін ұзарту туралы республикалық референдум өткізу жөніндегі бастамашы топтың республикалық жиналысы болып өтті. Оған қатысқан 14 облыс пен Астана және Алматы қалаларынан келген 850 делегат бастаманы бірауыздан қолдады. Бұл бастама қазақстандықтардың құлағына тиісімен, республикамыздың түкпір-түкпірінен оны қолдаушылардың қатары күн өткен сайын көбейді.

Өз кезектерінде Парламент депутаттары да референдум өткізу туралы бастамаға қызу қолдау білдірді. Осылайша, 2010 жыл мен 2011 жылдың аралығындағы аз ғана күн ішінде қоғам тың бастаманы қызу талқылауға кірісіп кетті.

Semeynews.kz

Дерек көзі – ҚазАқпарат халықаралық ақпараттық агенттігі