“СМУ” КеАҚ Университеттік госпиталінде Атчабаров атындағы конференция аясында кардиохирургтардың шеберлік сабақтары өтті
2025 жылғы 23 тамызда “СМУ” КеАҚ Университеттік госпиталінде Б.А. Атчабаров атындағы XVII Халықаралық конференция «Экология. Радиация. Денсаулық» шеңберінде шеберлік сабақтары өткізілді. Оған госпитальдің кардиохирургия және кардиоанестезиология бөлімшелерінің жетекші мамандары Павлодар облыстық кардиологиялық орталығының кардиохирургия бөлімінің меңгерушісі Мұрат Райхановпен бірлесіп қатысты.
Шеберлік сабақтары міндетті әлеуметтік медициналық сақтандыру (МӘМС) жүйесі аясында ұйымдастырылды. Бұл Семей өңірінің пациенттеріне жоғары технологиялық операцияларды тегін өткізуге мүмкіндік берді. МӘМС жүйесінің арқасында Қазақстан тұрғындары бұрын тек шетелде немесе санаулы орталықтарда ғана қолжетімді болған заманауи емдеу әдістеріне, соның ішінде жүрекке жасалатын күрделі операцияларға қол жеткізе алады.
Шеберлік сабақтарының барысында екі бірегей операция жасалды:
– аорта аневризмасы және қақпақшаның зақымдануы бар науқасқа аортаның бір бөлігі қақпақшамен бірге табысты алмастырылды (Бенталл-де Боно операциясы);
– аорталық қақпақшаның ауыр стенозы бар науқасқа аорталық қақпақша биологиялық протезбен алмастырылды.
Операцияға дейін пациенттер ентікпе, төс артындағы ауырсыну және күнделікті өмірде шектеулерге тап болған. Енді оларда толыққанды әрі белсенді өмірге оралуға нақты мүмкіндік пайда болды.
2025 жылдың басынан бері “СМУ” КеАҚ Университеттік госпиталінде Бенталл-де Боно бойынша 7 операция жасалды. Бұл кардиохирургиядағы ең күрделі араласулардың бірі саналады.
ҚР Денсаулық сақтау министрлігінің деректеріне сәйкес, елімізде жыл сайын 2,5 мыңнан астам ашық жүрекке операция жасалады, оның ішінде қақпақшаларды протездеу және аневризмаларды түзету бар. МӘМС жүйесінің дамуының арқасында жоғары технологиялық медициналық көмек барған сайын қолжетімді бола түсуде: бүгінде мұндай операцияларды тек елорда мен Алматыда ғана емес, өңірлік кардиохирургиялық орталықтарда да жасауға болады.
Мұндай жүрекке жасалатын операциялардың құны 3 миллион теңгеден асады. Қазақстандағы көптеген отбасылар үшін бұл сома қолжетімсіз. Алайда МӘМС жүйесінің арқасында пациенттер мұндай операцияларды тегін алады — шығындардың барлығы МӘМС арқылы толық жабылады: хирургиялық араласу, дәрі-дәрмекпен қамтамасыз ету және операциядан кейінгі оңалту кіреді.
Шеберлік сабақтары дәрігерлер үшін білім беру алаңы ғана емес, пациенттер үшін нақты көмек болды. Елдің жетекші орталықтары мамандарының тәжірибе алмасуы диагностика мен емдеудің озық әдістерін енгізуге, Қазақстандағы медициналық көмектің сапасын арттыруға мүмкіндік береді.
Дәрігерлердің бірлескен еңбегі мен МӘМС жүйесінің қолдауының арқасында ауыр жүрек-қан тамырлары аурулары бар пациенттер жаңа өмірге үміт алуда.
