Абай облысында дене шынықтыру белсенділігінің өсуі байқалады
️Бұл туралы Абай облысының өңірлік коммуникациялар қызметінде өткен брифингте сала басшылары спорттық резервті дайындау, спорттық шеберлікті дамыту, сондай-ақ спортпен шұғылдану үшін материалдық-техникалық базаны нығайту туралы баяндады, – деп хабарлайды Semeynews.kz.
️2023 жылы өңірде азаматтардың дене шынықтыру және спортпен шұғылдану көрсеткішінің өсуі байқалды. 2022 жылмен салыстырғанда дене шынықтырумен үнемі айналысатындардың саны 3% – ға өсіп, халықтың 41% – құрады. Дене шынықтыру және спорт басқармасы басшысының орынбасары Дулат Советханұлы мұндай өзгерістер жаңа спорт нысандарын пайдалануға берумен және спорт ұйымдарын ашумен байланыстырады.
– Қазіргі уақытта Абай облысында 14000-нан астам адамды қамтитын 23 ұйым жұмыс істейді. Олардың ішінде 14 балалар мен жасөспірімдер спорт мектебі, олимпиадалық резервті даярлау орталығы, олимпиадалық және бұқаралық спорт түрлері бойынша жоғары спорт шеберлігі мектептері, мүмкіндігі шектеулі жандарға арналған спорт клубтары бар. Спортшылардың облыстағы табысты нәтижелері үшін қолайлы жағдайлар жасалған және дене шынықтыру мен спортты дамытудың маңызды бөлігі инфрақұрылым болып табылады. Абай облысында 551 спорт нысаны, оның ішінде стадиондар, спорт кешендері, жүзу бассейндері, ипподромдар, теннис корттары және басқалары бар, – деді Дулат Советханұлы.
️”Даму бала” электронды платформасы да балалар мен жасөспірімдер арасында спортты дамытуда маңызды рөл атқарады. Спикер өз сөзінде осы платформаның арқасында 3400-ден астам балалар мен жасөспірімдер спорт секцияларымен, соның ішінде ауылдық жерлерде де қамтылғандығын атап өтті.
Мүмкіндігі шектеулі жандар арасында спортты дамытуға қолайлы жағдай жасау мақсатында арнайы спорт клубы жұмыс істейді. Клубта әртүрлі спорт түрлері бойынша 11 бөлімше бар.
️Облыстағы ауылдық жерлерде халықты деншынықтыру және спортпен қамту үшін қазіргі уақытта “Ауыл – ел бесігі” жобасы аясында Бородулиха, Көкпекті, Таскескен, Абай аудандарында 4 спорт нысанының құрылысы жүргізілуде. Нысандар 2024 жылы пайдалануға беріледі.
Semeynews.kz
