Фестиваль 2022 жылдың 5-7 қазан аралығында М.О.Әуезов атындағы педагогикалық колледж базасында өтеді. Іс-шара ҚР Білім және ғылым министрлігінің, Абай облысы әкімдігінің және облыстық білім басқармасының қолдауымен ұйымдастырылуда, -деп хабарлайды Semeynews.kz.
Фестиваль аясында “Сөз құдіреті” атты республикалық оқырмандар байқауы және Абай атындағы театрда “Ұлылыққа тағзым” атты мерекелік кеш өтеді.
Фестивальге абайтанушылар, әуезовтанушылар, профессорлар мен мұғалімдер, сондай-ақ жоғары оқу орындарының басшылары қатысады. Айта кетейік, оқырмандар байқауына Қазақстанның 19 қаласының студенттері қатысады.
Байқау жеңімпаздары демеушілерден ақшалай сыйлықтармен марапатталады:
Бас жүлде – 100000 теңге
І орын – 80000 теңге
ІІ орын – 60000 теңге
ІІІ орын – 40000 теңге.
6 қазанда Абай театрында “Абай аялаған арулар” эстетикалық-танымдық қойылымы көрсетіліп, республикалық фестивальдің қорытындысы шығарылады.
7 қазанда фестиваль қатысушылары Абай ауданына барып, М.Әуезовтің Бөрілідегі үй-музейіне, Еңлік Кебек кесенесіне, Жидебайдағы Жидебай Абай-Шәкәрім мемориалдық кешеніне, Абай туған Сырт Қасқабұлақ жеріне, сондай-ақ Ақшоқы мен Күшікбайдағы музейге барады. Қарауыл ауылында “Қаламқас” халық ән-би ансамблінің концерті өтеді.
Semeynews.kz
