Шығыс Қазақстан облысы Шемонаиха ауданы Рулиха ауылында 600 басқа арналған тауарлы-сүт фермасының бірінші кезегі аяқталып, сауынды сиырлар мен бұзаулар ұсталатын орын, сүт сауу залы іске қосылды.
Былтыр және биыл «Рулиха» ЖШС-не Нидерландыдан 600 бас голштин асыл тұқымды сиырлары әкелінген. Қазір асыл тұқымды мал төлдеп, 324 бұзау алынған. Бұл тұқым түрі дүниежүзіндегі ең сүтті бағыттағы мал болып саналады.
Серіктестік басшылығы сүт фермасын да ең озық деген құрал-жабдықтармен жабдықтап отыр. Израильдік Afimilk фирмасының сүт сауу аппараттарын алып, мал тұратын орынға италияндық Rota Guido компаниясының жабдықтарын орнатқан. Қазір тауарлы-сүт фермасында 300- ден астам сиыр сауылып отыр. Әрқайсысы тәулігіне 30 литр көлемінде сүт береді. «Рулиха» шаруашылығының сүті облыстағы барлық ірі сүт өндірушілерге жеткізіліп жатыр.
Сүт фермасының екінші кезегінде 484 басқа арналған мал тұрағы, мал бордақылау алаңы, екі бұзау ұстайтын орын, сою алаңы салынады. Болашақта шаруашылықтағы сауынды сиыр басы өз төлі есебінен 1080 басқа жеткізілмек.
Semeynews.kz.
