Номиналы 500 теңгелік монеталар күмістен жасалған, таралымы – 5000 дана. 100 теңгеліктер нейзильбер қоспасынан дайындалған, 100 000 данасы шығарылды.
Монеталарды шығару Семей ядролық полигонының жабылғанына 30 жыл толуына орайластырылған.
Монета дизайнының тұжырымдамасы ядролық сынақтардың тарихын суреттейді. “Саңырауқұлақ” түріндегі ядролық жарылыстың стильдендірілген бейнесі екі бөліктен тұрады. Сол жақ бөлігі ядролық сынақтардың тарихын бейнелейді және құрбан болған адам өмірі мен шырғалаңға түскен тағдырын бейнелейтін сынық кескіндер түрінде берілген. Оң жақ бөлігі зардап шеккен табиғаттың символы ретінде құрғақ ағаштың стильдендірілген бейнесінде жасалған. Кеуіп кеткен ағаш бұтағындағы жасыл жапырақтың бейнесі – қайта өрлеу мен қылаң берген үміт белгісі.
Монеталардың аверсінде орталық бөлігінде ою-өрнек аясында Қазақстан Республикасының Мемлекеттік Елтаңбасы, айналдыра мемлекеттік тілде QAZAQSTAN RESPÝBLIKASY деген жазу, жоғарғы бөлігінде Қазақстан Ұлттық банкінің логотипі орналасқан.
Монетаның реверсінде “саңырауқұлақ” түріндегі ядролық жарылыстың стильдендірілген бейнесі бар. Монетаны айналдыра SEMEI IADROLYQ POLIGONYNYŃ JABYLǴANYNA деген жазу, ортасында оқиғаның мерейтойлық күнін білдіретін 30 JYL және “1991-2021” деп көрсетілген.
“Номиналы 500 және 100 теңгелік коллекциялық монеталар төлемнің барлық түрі бойынша Қазақстан аумағында қабылдануға, сондай-ақ банк шоттарына есепке алынуға және аударылуға міндетті. Сонымен бірге барлық банкте шектеусіз ұсақталады және айырбасталады”, – деп атап өтті баспасөз қызметіндегілер.
Монеталарды сату күні туралы ақпарат кейінірек Ұлттық банк сайтында жарияланады.
