Семейде робототехникадан турнир өтті

2023 жылғы 22 сәуір күні Семей қаласында «Ozyq Urpaq» бағдарламасына қатысушылар арасында робототехника бойынша турнир өтті, – деп хабарлайды Semeynews.kz.

Аталған іс-шараны елордалық жетекші «Роботек» робототехника мектебі, Абай облысының білім басқармасы Нұрсұлтан Назарбаев Қорының қолдауымен бірлесіп өткізді.

«Ozyq Urpaq» – бұл 2022 жылдың қараша айынан бастап мектеп оқушыларына робототехника бойынша факультативтік сабақтар жүргізуге мүмкіндік берген бағдарлама. Бұнымен қатар, педагогтер факультативтер өткізе отырып, Қордан жалақы алып отырды.

Семей қаласының № 8, № 28, № 44, № 49 жалпы орта білім беру мектептерінің, № 37 Ы.Алтынсарин атындағы гимназияның оқушылары заманауи білім алды.

Жобаның соңында балалар арасында алған білімдерін тексеру және сертификаттар табыстау үшін ауқымды турнир өткізілді. Мектептерге өңірде робототехниканы одан әрі дамытуға ықпал ететін robotek.pro платформасына бір жыл көлемінде тегін жазылым берілді.

Semeynews.kz