Семей қаласында Абай облысы білім басқармасының «Инновациялық-әдістемелік орталығы» және «КазРоботикс» Қазақстандық білім беру және спорттық робототехника федерациясы» Республикалық қоғамдық бірлестігінің ұйымдастыруымен «RoboBalapan-2023» Республикалық балалар шығармашылығы фестивалінің облыстық кезеңі өтті, – деп хабарлайды Semeynews.kz.
Іс-шара балалар мен ересектер арасында робототехника тақырыбын дәріптеуді, балалар мен олардың ата-аналарын бірлескен шығармашылық жұмысқа ынталандыруды, баланың білім беру қызметіне серіктес ретінде тартуды, өскелең ұрпақтың дамуына қолайлы орта қалыптастыруда отбасы мен педагогтер одағының рөлін арттыруды мақсат етеді.
- ХХІ ғасырда өркениет өрісіне ілесуде заманауи технологиялық үдерісті дер кезінде енгізіп отыру керек. Әсіресе, робот технологияны меңгеру маңызды. Қазіргі таңда Қазақстанның әр өңірінде турнирлер өткізіп, өз идеяларымызды іске асырып келеміз. Түрлі ұйымдармен байланысып, еліміздегі талантты жастардың бойындағы дарынын оятып, жетілдіруге атсалысудамыз, – ҚР Білім беру және спорттық робототехника Федерациясының Президенті Айжан Жекеева.
Фестивальға 5-6 жас аралығындағы балабақша және мектепке дейінгі білім беру ұйымдарының білім алушылары, ата-аналары (заңды өкілдері), педагог-жетекшілерінен құралған 11 команда қатысады. Командалар үш тапсырма бойынша сайысқа түсті.
І орынды Абай ауданы Абай атындағы мамандандырылған мектеп-гимназия интернатының «Intellect» тобы және Семей қаласы №4 Балдәурен бөбекжайының «Балдәурен» тобы иленді.
ІІ орынға Жарма ауданы, Абай атындағы мектеп-балабақшасының «Robotics» тобы және Бородулиха ауданы Н.Островский атындағы орта мектептің «Фиксики» тобы жайғасты.
ІІІ орынды Бесқарағай ауданы, Өндіріс орта мектебінің «I-robot» тобы және Көкпекті ауданы, Көкпекті орта мектебі «Юный техник» тобы алды.
Жеңімпаз командалар «ҚазРоботикс» Федерациясының диплом және медальдарымен марапатталды, сондай-ақ барлық қатысушыларға сыйлықтар берілді. Үздік командалар фестивальдің республикалық кезеңінде облысымыздың намысын қорғайды.
Semeynews.kz
