Тәуелсіздік шежіресі: 2011 жыл — Ел мерейі еселенген жыл

ҚР Тәуелсіздігінің 20 жылдығына қарай қадам басқан Қазақстан үшін 2011 жылдың басы саяси өмірдегі қызу мәселелерді қоғам болып талқылаумен ерекшеленді. Атап айтқанда, 2010 жылдың еншісінен 2011 жылға ауысқан аса маңызды мәселенің бірі - ҚР Президентінің өкілеттігін ұзартуға қатысты болатын. Нақтыласақ, 2010 жылдың желтоқсанында Өскемен қаласында Тұңғыш Президент - Елбасы Н.Ә.Назарбаевтың өкілеттігін 2020 жылдың 6 желтоқсанына дейін ұзарту туралы республикалық референдум өткізу жөніндегі бастамашы топтың жиыны өтті. Оған қатысқан 14 облыс пен Астана және Алматы қалаларынан келген 850 делегат бастаманы бірауыздан қолдады. Бұл бастаманы республикамыздың түкпір-түкпірінен оны қолдаушылардың қатары күн өткен сайын көбейді. Өз кезегінде Парламент те референдум өткізу туралы бастамаға қызу қолдау білдірді. Осылайша, 2010 жыл мен 2011 жылдың аралығындағы аз ғана күн ішінде қоғам тың бастаманы қызу талқылауға кірісіп кетті.