Бейбітшілік аралында Конституция күніне орай Полиция басқармасы гарнизондық таралым жиынын өткізді. Іс-шараға қала әкімінің міндетін атқарушы Бекжан Бапышев, Полиция басқармасының бастығы Қайрат Әбдіғалиев және полиция қызметкерлері қатысты.
Алдағы мерекелік іс-шаралар кезінде Полиция басқармасы күшейтілген режимде жұмыс атқаратын болады. Бұл азаматтардың қауіпсіздігін қамтамасыз етуге, қоғамдық тәртіпті сақтау мен кез келген қауіп-қатердің алдын алуға бағытталған қырағы қызметтің бір бөлігі.
Бүгінгі күні Семей қалалық полиция басқармасында мыңға жуық қызметкер қаланың қоғамдық тәртібі мен қауіпсіздігін қадағалап, тәулік бойы тынымсыз еңбек етуде. Олардың әрқайсысы – өз ісінің майталманы, антқа адал азаматтар екені белгілі, – деді Бекжан Бапышев өз сөзінде.
Айта кету керек, 2024 жылы қала орталығында екі учаскелік полиция пункті ашылса, биыл шет аумақтарда тағы екі жаңа пункт іске қосылмақ.
Жиын барысында полиция қызметкерлері қала әкімінің міндетін атқарушысының Құрмет грамоталарымен және Алғыс хаттарымен марапатталды.
