Семей медицина университетінде Б.А. Атшабаров атындағы XVII халықаралық «Экология. Радиация. Денсаулық» ғылыми-практикалық конференциясы басталды. Жиынға қала әкімінің орынбасары Қуаныш Әбілдаев, Семей медицина университетінің Басқарма Төрағасы – Ректор Алтай Дюсупов және дәрігерлер мен ғалымдар қатысты.
Отырыс барысында Қуаныш Әбілдаев облыс әкімі Берік Уәлидің құттықтау сөзі жеткізді.
Бұл конференцияның біздің өңірде өтуі – тек маңызды ғылыми оқиға ғана емес, сонымен қатар Қазақстан мен әлемдік ғылым тарихындағы өңіріміздің ерекше рөлін айқындайтын қоғамдық және гуманитарлық маңызы бар маңызды қадам. Абай облысы – тағдыры ерекше аймақ. Семей ядролық сынақ полигонында жүргізілген сынақтардың салдары мыңдаған жерлестеріміздің өміріне өшпес із қалдырды. Бұл трагедияның экологиялық және медициналық зардаптары әлі күнге дейін ғылыми талдауды, жүйелі көзқарасты және үздіксіз, тұрақты көңіл бөлуді қажет етеді. Осы себепті қоршаған ортаның зиянды факторларының әсеріне байланысты аурулардың алдын алу мен емдеу, экологиялық және радиациялық қауіпсіздік деңгейін арттыру, қазіргі және болашақ ұрпақтың денсаулығын сақтау бағытындағы зерттеулер аса маңызды. Бүгін ашылып отырған конференция – өз өмірін ғылымға, денсаулық сақтауға және радиациядан зардап шеккен халықтың денсаулығын қорғауға арнаған көрнекті ғалым, академик Бахия Атшабаровтың есімімен аталады, – делінген құттықтау сөзде.
Ғылым – өткеннің жарасын емдеп,болашаққа сеніммен қарауға мүмкіндік беретін күш. Қазіргі таңда экологиялық және радиациялық факторлардың адам денсаулығына тигізетін әсерін зерттеу – тек аймақтық емес, жаһандық деңгейдегі өзекті мәселе.
Бұл жиын – бірлескен еңбектің, ортақ жауапкершіліктің көрінісі болмақ.
