МӘМС: Жұмыс берушілер ұзақ демалыстар кезінде жарналарды қалай дұрыс төлеуі керек
Абай облысы бойынша «Әлеуметтік медициналық сақтандыру қоры» КЕАҚ филиалы қызметкерлердің ұзақ ақылы демалыстары кезінде МӘМС жарналарын есептеу мен төлеу тәртібі туралы еске салады.
2024 жылғы 21 сәуірден бастап Қазақстан Республикасында міндетті әлеуметтік медициналық сақтандыру (МӘМС) жүйесіне жарналар мен аударымдарды есептеу мен төлеу тәртібіне өзгерістер күшіне енді. Бұл өзгерістер ұзақ мерзімді демалыстағы қызметкерлердің МӘМС жүйесіндегі сақтандырылған мәртебесін үздіксіз қамтамасыз етуге бағытталған.
Ұзақ мерзімді демалыс деген не?
Ұзақ мерзімді демалыс — күнтізбелік бір немесе одан да көп айды қамтитын ақылы еңбек демалысы. Мысалы, егер қызметкер маусым айының соңында демалысқа шығып, тамызда оралса, бұл демалыс ұзақ мерзімді болып есептеледі.
Ұзақ демалыс кезіндегі МӘМС жарналары мен аударымдарын қалай дұрыс төлеу керек?
Егер демалыс бірнеше күнтізбелік айға созылса, еңбек демалысына төленетін қаражаттан есептелетін жарналар мен аударымдар келесі тәртіппен жүргізілуі тиіс:
1. Жарналар мен аударымдарды айларға бөлу, яғни демалыс күндерінің әр айдағы санына пропорционалды түрде есептеу.
2. Барлық сома бір төлем тапсырмасымен аударылады, бірақ әр ай бойынша жеке-жеке көрсетілуі керек.
Мысал:
Егер қызметкер 25 маусым мен 18 тамыз аралығында (56 күн) демалыста болса:
• Маусым айына — 7 күн
• Шілде айына — 31 күн
• Тамыз айына — 18 күн
Сәйкесінше, МӘМС жарналары мен аударымдары осы күндерге сай әр айға бөлініп аударылуы қажет.
Бұл не үшін маңызды?
Жарналарды дұрыс төлемеу, мысалы, бүкіл сома бір айға ғана төленсе, қызметкердің МӘМС жүйесінде сақтандырылған мәртебесі жойылуы мүмкін. Бұл жағдайда азамат медициналық сақтандыру аясында көрсетілетін қызметтерді ала алмайды.
Сақтандырылған мәртебені қалай тексеруге болады?
Мәртебені келесі құралдар арқылы тексеруге болады:
• «Әлеуметтік медициналық сақтандыру қоры» сайты: msqory.kz
• Telegram-бот: @SaqtandyryBot
• «Qoldau 24/7» мобильді қосымшасы
• Электрондық үкімет порталы: egov.kz
Жұмыс берушілерге арналған ұсыныстар
• Бухгалтерлерге: Ұзақ мерзімді демалысқа төленетін қаражаттан МӘМС жарналарын есептегенде айларға бөлуді ұмытпаңыз және төлем тапсырмасында әр ай бойынша нақты көрсетіңіз.
• Жұмыс берушілерге: Жарналарды дер кезінде және дұрыс төлеңіз. Бұл қызметкерлердің сақтандырылған мәртебесін сақтап, медициналық қызметтерді үздіксіз алуына мүмкіндік береді.
Осы талаптарды сақтау қызметкерлердің денсаулығын сақтауға көмектесіп қана қоймай, жұмыс берушінің заң алдындағы міндеттерін де орындайды.
