Абай облысында Крещение мерекесіне 7 шомылу орны дайындалды

Өңірде “Крещение Господне” мерекесіне орай халықтың қауіпсіздігін қамтамасыз ету мақсатында суға шомылу үшін арнайы орындар белгіленген. Бұл туралы Облыстық Төтенше жағдайлар департаментінің Азаматтық қорғаныс басқармасы бастығының міндетін атқарушы, подполковник Есен Қуантхан мәлімдеді.

– Облыстың 5 ауданында мереке кезінде суға түсу үшінарнайы 7 орын белгіленді. Бұл орындарда шомылу қауіпсіздігін қамтамасыз шаралары қамтылған. Өткен жылы суға шомылу орындарының бесеуі арнайы жабдықталған болатын. Мереке кезінде суға түсушілер саны әр жылда әртүрлі болады. Деседе осы күні Абай облысы бойынша “Апаттар медицинасы орталығы” ММ филиалының департаменті мен бригадалар қызметкерлерінің тәулік бойы кезекшілігі ұйымдастырылады, – деді подполковник Есен Қуантхан.

Ағымдағы жылы шомылушылар үшін жабдықталған 7 орын белгілі. Атап айтар болсақ Семей қаласы бойынша Ертіс өзенінің Затон бөгеті және Воскресенский шіркеуі, Бесқарағай ауданында “Қасиетті кілт” қажылық орны, Бородулиха ауданына қарасты Үлкен көлі мен Новая – Шульба ауылындағы Киров тоғаны, Курчатовта “Маяк” қонақ үйінің артындағы Ертіс өзенінің жағалауы және Үржар ауданындағы Болашақ паркінде орналасқан бұлақ дайындалған.

Сонымен қоса брифингте Абай облысының дін қызметкері Евгений Яганов атаулы күннің маңыздылығы мен шомылу рәсімі туралы атап өтті.

– Крещение Господне мейрамы тек діни мереке емес, ол ұлттық мәнде атап өтіледі. Халықтар арасындағы бірлік пен татулықты нығайтып, ауызбіршілікке шақырады. Христиандар суға шомылып, өздерінің рухани жаңарғанын сезінеді, күнәларынан тазарып, жаңа өмірге қадам басады деп сенеді. Сонымен қатар, бұл мереке христиан қауымына бірігіп, сенімдерін нығайтып, рухани тазалыққа ұмтылуға мүмкіндік береді, – деп жеткізді Евгений Яганов.

Абай облысының Төтенше жағдайлар департаменті “Крещение Господне” мерекесі кезінде қауіпсіздікті барынша қатаң сақтауды ескертті.

Semeynews.kz