Абай облысында аудандық және ауылдық ауруханаларда медициналық инфрақұрылым жақсаруда
Ауылдық медицинаны дамыту жөніндегі Ұлттық жобаны жүзеге асыру аясында Денсаулық сақтау басқармасы мен медициналық сақтандыру қорының облыстық филиалы аудандық және ауылдық ауруханалардағы жағдайды жақсартуға айрықша көңіл бөледі. МӘМС-тің тұрақты қаржыландыруының арқасында ауылдық жерлердің тұрғындары үшін неғұрлым сапалы медициналық қызметтерді қамтамасыз ете отырып, медициналық инфрақұрылымды жаңғырту жүзеге асырылуда.
Мысалы, Аягөз аудандық орталық ауруханасында бейнеэндоскопиялық кешен сатып алынды. Медицина қызметкерлері 65 жастағы Аягөз қаласының тұрғынына заманауи аз инвазивті операцияны сәтті жүргізді.
«Науқас шұғыл түрде ауруханаға оң жақ қабырға астындағы ауырсыну белгілері, жүрек айну, құсу, ауыздың құрғауы сынды шағымдармен түсті. Егжей-тегжейлі тексеруден кейін өт тас ауруы, жедел калькулозды холецистит диагноздары қойылды. Дайындық жұмыстары жүргізілгеннен кейін біз анестезиямен лапароскопиялық холецистэктомия жасадық. Емделушіге арналған барлық тексерулер мен операция МӘМС желісі бойынша тегін жүргізілгенін атап өткім келеді», – деді ота жасаған хирургтардың бірі.
Ол сондай-ақ мұндай операцияның асқынулардың минималды жиілігі, операциядан кейінгі кезеңдегі аздап ауырсыну, жақсы нәтиже және тезірек қалпына келу сияқты бірқатар артықшылықтары бар екенін атап өтті.
Қазіргі уақытта науқастың жағдайы қанағаттанарлық және ол толыққанды өмір сүруде. Науқастың өзі дәрігерлерге кәсібилігі үшін алғыс білдіреді:
«Диагноз қойылғаннан кейін мен хирург Думан Жақияновпен кеңесіп жүрдім. Ол мұндай операциялар қазір біздің ауруханада да жасалатынын, енді қалаға барудың қажеті жоқ екенін айтты. Операциядан кейін мен өзімді жақсы сезінудемін».
Бұдан басқа, субсидиялау шеңберінде Аягөз ОАА үшін өкпені жасанды желдету аппаратын, фиброгастроскопты және бронхофиброскопты қоса алғанда, қосымша медициналық жабдық сатып алынды.
Semeynews.kz
