Жоспарға сәйкес былтырғы жылы 350-ден астам бұқаралық спорттық іс-шара өткізілген. Бұл жайлы Абай облысының өңірлік коммуникациялар қызметі алаңында Семей қалалық дене шынықтыру және спорт бөлімінің басшысы Бауыржан Дүйсенбаев ақпаратпен бөлісті, – деп хабарлайды Semeynews.kz.
- Бүгінде Семей қаласында 350 мыңнан астам тұрғын бар, оның ішінде 74 243 оқушылар мен студенттер. Қазіргі күні қалада спортпен шұғылданатын белсенді жастар үшін 329 спорт нысаны жұмыс істеуде », – деді Бауыржан Дүйсенбаев.
Сонымен қатар, бөлім басшысының айтуынша, өткен жылы Семейде барша азаматтарға арналған спорттық-сауықтыру жобалары ұйымдастырылған.
- 2023 жылы әкімдіктің арнайы жоспары аясында барлық отбасы тұрғындары үшін «Спорт барлығына» тегін жобасы жүзеге асырылды. Қала спорт түрлері бойынша аптасына екі рет сауықтыру шаралары өткізілетін 5 орынға бөлінді: «Йога», «Кроссфит», «Зумба», «Жүгіру», «Скандинавиялық серуендеу». Бұл бастаманы қолдау үшін қалалық бюджеттен қаржы бөлінді, – деп түсіндірді спикер.
Бауыржан Дүйсенбаевтың айтуынша, 2024 жылға спорттық іс-шараларды ұйымдастыру және өткізу, салауатты өмір салтын насихаттау және халықтың барлық топтары үшін спортпен айналысуға қолайлы жағдай жасау міндеттері қойылған. Биылғы жылы Семейде 400-ден астам бұқаралық-спорттық іс-шара өткізу жоспарлануда. Жалпы қалада 73 спорт түрі дамыған, оның 30 олимпиадалық спорт түрлері.
Semeynews.kz
