Абай облысы Көкпектіде дәстүрлі садақ ату сайысы өткізілді

Көкпекті ауданында дәстүрлі садақ атудан алғашқы аудан чемпионаты өткізілді. Ұлттық спорт ойындары орталығы ұйымдастырған чемпионатты Өскемен қаласының «Керемет» садақ ату орталығының білікті мамандары жетекшілік жасады, – деп хабарлайды Semeynews.kz.

Садақшылар сайысына Көкпекті ауданының ауылдарынан 57 мерген қатысты. Сайыскерлер 12-16 жас аралығындағы оқушылар, 17-30 жас аралығындағы жастар, 31-45 жас аралығындағы ересектер және 46 жастан жоғары ардагерлер болып 4 санат бойынша сынға түсті. Жарыстың басты мақсаты тұрғындарды спортқа және ұлттық құндылыққа деген қызығушылығын арттыру, қазақылықты жаңғырту. Бұл сайыстан іріктелген мергендер алдағы уақытта Абай облысы чемпионатында аудан намысын қорғамақ.

Сайысқа Өскемен қаласынан арнайы келген «Керемет» садақ ату орталығының жетекшісі Бибати Тұрымтайқызы төрелік жасады. Білікті маман сайыс алдында ауданда алғаш өткізіліп жатқан жарыс қатысушыларына дәстүрлі садақ атудың әдіс-тәсілдері мен қауіпсіздік ережелерін түсіндіріп өтті.

• Садақ ату денсаулыққа өте пайдалы. Халқымызда мергендер епті әрі ақыл-ойы жоғары болады деп саналған. Нысананы дәлдеу үшін адам миында қаншама формула құрады, амал ойластырады, жоспарлайды – мұның бәрі тұнып тұрған математика. Денсаулық тұрғысынан айтсақ, садақ ату арқаны тік ұстауға, көру қабілетінің жақсаруына көп көмектеседі, – дейді «Керемет» садақ ату орталығының жетекшісі.

Бұрын сонды Көкпекті өңірінде өткізілмеген жарысқа қызығушылар саны өте көп. Аудан орталығы Көкпекті ауылының садақшыларынан бөлек Шұғылбай, Көкжайық, Ажа ауылдарынан арнайы келгендерде болды. Барлығының мақсаты біреу – садақ ату дәстүрін дамыту, оны бұқаралық спорт түріне айналдыру.

Өте тартысты өткен додада жас ерекшелігіне қарай бөлінген 4 санатта өзара мықтыны анықтады. Оқушылар 12 метр қашықтықта сынға түссе, жастар мен ересектер 18 метрден садақ атып жарысты. Әрбір қатысушыға үш мүмкіндіктен беріліп, әр мүмкіндікте 5 жебеден атылды.

Садақшылар жарысының қорытындысы бойынша оқушылар арасында Көкпекті орта мектебінің 3 бірдей оқушысы жүлдегер атанды. Ұлттық спорт орталығында садақ атып жаттыққан Гүлден Еркінқызы топ жарып, 1 орынды жеңіп алса, екінші орынды Дарын Бердібек еншілеген. Ал, оқушылардың үштігіне Нұрасыл Балабек жайғасты.

Жастар арасында Ерлан Әзімбай жебесін нысанаға көбірек дәл тигізіп, бірінші орын иеленді. Екінші орынды Раджан Қайыпжан, жүлделі үшінші орынды Қаныш Айтқалиев қанжығасына байлады.

Ересектер арасында асқан мергендігімен көзге түскен Қайратбек Нұрқасымов ең жоғарғы көрсеткішке қол жеткізіп, жеңіске қол созымдай ғана жетпей қалған Нұржан Тогусов екінші орынды қанжығаласа, үшінші орынды Ерен Естелік жеңіп алды.

Ардагерлер арасында Әсет Танысбаев үздік шығып, дәстүрлі садақ атудан Көкпекті ауданының алғашқы чемпионатының жеңімпазы атанды. Жүлделі екінші орынды спорт ардагері Болат Юсупов иеленсе, үшінші орынды Шұғылбай ауылынан келген Талғат Мұқатаев олжалады.

Жеңімпаздар мен жүлдегерлерге арнайы дипломдар, жеңімпаз медалі мен ақшалай сыйлықтар табыс етілді. Биыл ғана ашылған Ұлттық спорт ойындары орталығының директоры Бауыржан Түсіпжанов бұл бағыттағы шаралар мұнымен шектеліп қалмайтынын атап өтті. Болашақта көкпар, бәйге, теңге алу, аударыспақ, асық ату сынды дәстүрлі ұлттық спорт түрлері де өткізілмек.

Semeynews.kz