Абай облысының мұғалімдері зағип жандарға арналған “электронлды жетекші” таяқшасын ойлап тапты

Абай облысы Аягөз ауданының мұғалімдері көру қабілеті нашар адамдардың өмір сүру сапасын жақсарту үшін пайдалы өнім ойлап тапты, – деп хабарлайды Semeynews.kz.

Күнделікті өмірде қауіпсіз қозғалысты, өзіне деген сенімділікті қамтамасыз ететін «Электрондық жетекші» деп аталатын құрылғы әр түрлі жарақаттардың алдын алады.

Бұл – көздері нашар көретін зағип жандардың күнделікті жүріп-тұруына көмектесетін инновациялық құрылғы.

Таяқтағы датчик пайдаланушының жолындағы кедергілерді алдын ала анықтап, оларға соқтығысуын болдырмайды. Заманауи таяқтың басқа да мүмкіндігі зор, мысалы орнатылған арнайы зуммер датчигі арқылы дыбыстық нұсқаулар береді және пайдаланушыға қажетті орынды табуға көмектесетін мобильді қолданбалар да бар. Қоршаған ортадағы әртүрлі нысандарды және басқа да маңызды бөлшектерді анықтауға көмектесетін компьютерлік көру технологиясы да қарастырылған. Сондай-ақ басқа құрылғыларға қосылу мүмкіндігіне ие, яғни қосымша мүмкіндіктерді қамтамасыз ету үшін смартфондар сияқты басқа құрылғылармен өзара әрекеттестіруге болады.

«Ең бірінші Arduino мен ультродыбыстық датчик арасында байланыс болу үшін, оны сымдар арқылы жалғадық. Ол кедергілерді көреді. Келесі зуммер датчигін қосып, дыбыс шығатынын байқадық. Қуат беру үшін батарея қажет болды. Arduino-ны бағдарламасын пайдаланып, C++ тілінде программасын жаздық. Компьютер мен жасаған машинаны USB шнурмен жалғап, жазған программаны электронды жетекшіге жүктедік», – дейді жоба авторлары.

Мұғалімдер «Электронды жетекші» құрылғысына жұмсалатын шығын мен кірісті де ойластырған. Олардың есептеуінше, бір таяқшаны жасап шығару үшін 7860 тг қажет, ал сатылымға 17000 тг – ге шығаруға болады. Қазақтанда мұндай құрылғы жоқ, сондықтан бағасы қолжетімді. Шетелде мұндай құрылғы 2-3 есе қымбат.
Болашақта жетекшілері мүгедектер қоғамымен келісіп, мемлекеттік сатып алумен тендерге шығуды жоспарлаған. Мүмкіндігі шектеулі жандарға таяқты алдырып беруге әбден болады деген сенімде.

Жоба авторлары: информатика пәні мұғалімдері Ибраева Алтынай Абылкасымовна, Искакова Арайлым Сарсенгазыевна, Куандекова Айжан Болатовна, орыс тілі пәні мұғалімі., Надырбаев Данияр, математика пәні мұғалімі.

Айта кетейік, Аягөздік мұғалімдер жобаларын қараша айында өтетін IT чемпионатқа дайындауда.

Semeynews.kz