Мемлекет басшысы Қасым-Жомарт Тоқаев Мажарстан Премьер-Министрі Виктор Орбанды І дәрежелі «Достық» орденімен марапаттады, – деп хабарлайды Semeynews.kz Kazinform-ға сілтеме жасап.
«Сіз Қазақстанда көрнекті саяси көшбасшы, уақыт сынынан өткен, әлемдік аренада үлкен құрметке лайық дос ретінде танымалсыз. Осыған байланысты сіздің қазақ-мажар қарым-қатынасын дамытуға ұдайы қосып келе жатқан үлесіңізді және көрнекті басқарушылық қабілетіңізді жоғары бағалайтынымызды айтқым келеді. Көп жағдайда сіздің қалтқысыз күш салуыңыздың, мызғымас жеке ұстанымыңыздың арқасында екі арадағы әріптестіктің келешегіне үлкен оптимизммен, тың талпыныспен қараймыз», — деді Қасым-Жомарт Тоқаев Ақордада.
Президент Мажарстан Премьер-Министрінің қос халықтың ынтымағы жолында сіңірген еңбегіне ерекше тоқталды.
«Сізді І дәрежелі „Достық“ орденімен марапаттау жөнінде шешім қабылдадым. Бұл — терең құрмет пен ізеттің, тату халықтарымыздың бірлігінің, қарым-қатынасымызды нығайтуға деген берік ынтаның, өзара құрметке құрылған сенімнің символы», — деді Мемлекет басшысы.
Бұған дейін Ақордада Мажарстан Премьер-Министрін қарсы алу салтанаты өткенін жазған едік.
Қасым-Жомарт Тоқаев Виктор Орбанмен кездесу кезінде екі елдің бауырластық байланысы туралы айтты.
Еске салсақ, кеше кешке Виктор Орбанды Астана әуежайында вице-премьер Серік Жұманғарин күтіп алған болатын.
Қазақстан басшылығымен келіссөз барысында Қазақстан мен Мажарстан арасындағы сауда-экономикалық, инвестициялық және мәдени-гуманитарлық салалардағы ынтымақтастықты одан әрі тереңдету мәселелері талқыланды.
Semeynews.kz
