Семейде Қарағайлы ықшам ауданында нефрология орталығы мен мектеп құрылысы жүргізілуде

Қала әкімі Нұрбол Нұрсағатов аталған аудандағы құрылыс нысандарын аралап, абаттандыру бойынша атқарылып жатқан жұмыстармен танысты, – деп хабарлайды Semeynews.kz.

Қаланың бас жоспарына сәйкес, оң жағалауда Қарағайлы ықшам ауданының егжей-тегжейлі жобалау жоспары әзірленді.

Қазіргі таңда Қарағайлы ықшам ауданында нефрологиялық орталық пен емхана салу мақсатында ауданы 0,4906 гектар жер телімі бөлініп, құрылыс жүргізуге дайындық жұмыстары басталды. Сондай-ақ, оқушы орындарының тапшылығын жою мақсатында ықшам ауданда 1200 оқушыға арналған мектептің құрылыс жұмыстары басталды.

“Қарағайлы ықшам ауданының даму қарқыны өте жоғары. Соңғы жылдары ықшам ауданға қоныстанушылардың да саны артты. Мектеп құрылысы келесі жылы жаз маусымында толық аяқталып, 2024 жылы қыркүйек айында аудан оқушылары осы мектепке баруы керек. Жұмысты жылдам, әрі сапалы аяқтаңыздар. Жер астындағы желілердің сапалы жүргізулеріне көңіл бөліңіздер”,- деді Нұрбол Нұрсағатов

Семей қаласы бойынша үй кезегінде 13 000-нан астам қала тұрғындары тіркелген. Осыған орай, Қарағайлы ықшам ауданында 26 бюджеттік көпқабатты тұрғын үйдің құрылыс жұмыстары жүргізілуде. 2023 жылдың соңына дейін мемлекеттік бағдарлама бойынша салынып жатқан 15 көпқабатты тұрғын үйдің (487 пәтер) құрылысын аяқтау жоспарлануда.

Semeynews.kz