Семейдегі Орталық саябақтағы Шәкәрім ескерткішіне гүл қою рәсімі өтті

Шәкәрім Құдайбердіұлының туғанына  165 жыл толуына орай, туған өлкесі Семейде бастау алған «Шәкәрім жүрген ізбенен»  шарасы ақын ескерткішіне гүл шоқтарын қойып, тағзым ету рәсімінен басталды, – деп хабарлайды Semeynews.kz.

Іс- шараға еліміздің әр өңірінен, Астана, Алматы, Павлодар, Теміртау қалаларынан келген ақын ұрпақтары қатысты. Алғашқы құттықтау сөз Абай облысының әкімі Нұрлан Телманұлы Ұранхаевқа берілді. Сонымен бірге республикалық «Абай» қорының Президенті Отантай Кәріпжанов және ақынның  шөбересі Нұрлан Мерекеұлы Зият сөз сөйледі.

Бағдарлама аясында 11-12 шілде күндері  Семейде және Абай  ауданында кемеңгер ақынның шығармашылық мұрасын насихаттау, халық жадында қалдыру мақсатында  көптеген іс-шаралар өтеді.

Абайдың «Жидебай-Бөрілі» мемлекеттік тарихи-мәдени және әдеби-мемориалдық қорық музейінде «Шәкәрім мұрасы-халықтың асыл қазынасы» көрмесі және суретші Мақаш Әлиақпаровтың «Шәкәрім әлемі»  сурет көрмесі ашылды.

Іс-шара 12 шілдеде Абай ауданында жалғасын табады.

Бағдарлама барысында қонақтар Жидебайдағы Абай музей үйімен, «Шәкәрімнің саят қорасы» экспозициясымен және ақынның өмірі мен шығармашылығына қатысты тарихи орындарды аралайды.

Сонымен қатар,  Жидебайдағы амфитеатрда « Шәкәрім баба өсиеті» облыстық жазба ақындар мүшайрасы және мерекелік «Қаламқас» ән-би ансамблінің концерті өтеді.

Адамдықтың ақ жолын, арлылықты өмірінің соңына дейін жырлап өткен қазақтың ғұлама ұлы Шәкәрім Құдайбердіұлының мұрасын насихаттау ақынның 165 жылдық мерейтойымен еш шектелмек емес.

Semeynews.kz