Семейліктер Абайдың «Көзімнің қарасы» әнін шырқады
Семей тұрғындары Абай облысының құрылуына 1 жыл толуына орай Ертіс өзенінің жағалауында Ұлы Абайдың «Көзімнің қарасы» әнін шырқады, – деп хабарлайды Semeynews.kz.
«Алаш қонған ақ боз үй» деп, Ахмет Байтұрсынұлы жырлағандай, Алашқа пана болған қарт Семей өз биігіне шықты. Осыдан 1 жыл бұрын Семей жұртшылығы үшін ақ түйенің қарны жарылған күн болды. Президентіміз Қасым-Жомарт Кемелұлы Тоқаевтың салиқалы саясатының негізінде, халықтың қалауы ескеріліп, Президент Жарлығымен Абай облысы құрылды. Бұл шешім – шын мәнінде, тарихи әділдіктің салтанат құруы болды.
Бүгін Абай облысының құрылуына бір жыл толуына орай, Ертіс өзеңінің оң жағалауында мерекелік іс-шара өтті. Мерекелік шараға облыс әкімі Нұрлан Ұранхаев, қоғам қайраткерлері мен өңір тұрғындары қатысты.
Бүгінгі кеште ең айтулы оқиға, мерекелік шараға жиналған қауым бір мезетте Абай облысының эстрадалық-симфониялық оркестрі сүйемелдеуімен Абайдың «Көзімнің қарасы» әнін орындады. Арнайы құрылған экранда Абай облысына қатысты бейнеролик көрсетілді.
Мерекелік шара жергілікті өнерпаздардың концерттік бағдарламасына ұласты.
Абай облысы жайнап, көркейіп дами берсін!
Semeynews.kz
