Жыл сайын 12 мамырда Қазақстанда Халықаралық медбикелер күні атап өтіледі, – деп хабарлайды Semeynews.kz.
Мейірбике – дәрігердің қабылдау уақытында және емделу, операциялар кезіндегі адал көмекшісі. Медбикенің функционалдық міндеттері науқастың жағдайы туралы көрсеткіштерді тіркеуді және олардың тиісті медициналық процедуралардан өтуін қамтамасыз етуді қамтиды.
Ұсынылған мәліметтерге сәйкес, Абай облысының мемлекеттік медициналық ұйымдарында 8559-дан астам білікті медицина қызметкері жұмыс істейді, оның ішінде 2164 дәрігер және 6395 орта медицина қызметкерлері.
Ал, кәсіби мерекеге орай радионуклидтік терапия бөлімінің аға медбикесі Динара Сайлаубекқызынан шағын сұхбат алуды жөн көрдік.
Мамандық бойынша қанша уақыт жұмыс істеудесіз?
- Менің медицина саласында жүргеніме 22 жылдан асты. 2001 ж. Д.Қалматаев атындағы медицина колледжінің жалпы медицина факультетін бітірдім. Одан кейін, 2002 ж. «Эмили» мейірбике ісі институтын бітіріп, «Менеджер медбике» біліктілігі бойынша диплом алдым. Сол оқу орнында жоғары білімді медбике дипломын алдым. Мен еңбек жолымды 2001 ж. бастадым. Облыстық онкологиялық диспансерде анестезиология, реанимация және қарқынды терапия бөлімінде бөлімше медбикесі қызметін атқардым. 2004 ж. анестезиолог медбике лауазымына ауыстырылдым. 2016 ж. анестезиология, реанимация және қарқынды терапия бөлімінің аға медбикесі болып тағайындалдым.
Бұл мамандық не себепті сізге ұнайды және таңдағаныңызға өкінген кез болды ма?
- Әр мамандықтың жақсы және жаман жақтары бар, әсіресе адамдармен жұмыс істеу әлсіздерге арналмаған. Дегенмен, мен әрқашан өз таңдауыма сенімді болдым. Ең бастысы – адамдарға шынымен көмектесу! Бала кезімнен адамдарға, әсіресе қиын жағдайға тап болған адамдарға бақыт пен пайда, көмек беруді армандайтынмын.
Айта кетейік, Динара Сайлаубекқызы Д. Қалматаев атындағы медициналық колледжінде сабақ береді. Оның айтуынша, ол көп жылдық тәжірибесі мен алған білімімен бөлісу керек. Сондай-ақ, Қазақстан инновациялық академиясының «Педагогика және психология» мамандығы бойынша дипломы бар, білім беру магистрі дәрежесі берілген.
- 2021 ж. біліктілікті арттыру бойынша Варшава қаласында болдым. «Радионуклидті диагностика және терапия» сертификатын алдым. Алған білімімді күнделікті жұмысыма енгізіп, басқа әріптестеріммен бөлісемін, – дейді аға медбике.
Қазіргі таңда Динара Сайлаубекқызы Абай облысының ядролық медицина және онкология орталығында радионуклидті терапия бөлімінде аға медбике болып жұмыс істейді. РТБ бөлімі еліміздің түкпір-түкпірінен адамдар келетін Қазақстандағы алғашқы және жалғыз бөлім. Айта кетейік, бөлімшедегі науқастар медициналық көмектің кепілдік берілген көлемі аясында тегін емделеді.
Осы орайда, Медициналық сақтандыру қорының Абай облысы бойынша филиалы «Халықаралық медбике» күнімен құттықтайды! Мейірімділік пен ықылас, ықылассыз көмек және шексіз күш-жігерлеріңіз үшін рахмет!
Semeynews.kz
