Семей “Динамо” стадионы қалай пайда болды

02.04.2023

Семей қаласында 100 жыл бұрын “Динамо” спорт қоғамы пайда болды, – деп хабарлайды Semeynews.kz.

В.Кашляктың ” Семипалатинские Арабески ” кітабында “Динамо” спорт қоғамының алғашқы ошақтары Қазақстанда 1924-1925 жылдары пайда бола бастағаны айтылған. Дегенмен, революцияға дейінгі фотосуреттер сақталған, онда әйелдер гимназиясы (зооветинститут) аумағында мұз айдыны құйылып, гимназияшылардың сырғанақ тебулері көрсетілген. 1922 жылдың соңында қалада спорт клубы ашылып, осы алаңда түрлі жарыстар өткізілгені анықталды. 1927 жылы бұл аумақ қоршаумен қоршалды – бұл болашақ «Динамо» стадионының басталуы.

1929 жылғы мамырда алаңда жазғы спорт базасы ашылды, ол жерде атыс тирі жабдықталды. Кіру тегін болды, ал атыс барлық калибрлердегі қару түрлерінен 100 метр қашықтықта жүргізілді.

1933 жылдан бастап стадионда қоғамның онжылдығы салтанатты түрде атап өтілді, ал бір жылдан кейін бұрын Знаменская деп аталған әйелдер гимназиясының жанындағы спорт алаңы баспасөзде “Динамо” деп атала бастады.

1934 жылдан бастап гимнастикалық жарыстар өткізіле бастады, ал 1935 жылы маусымда стадионда футбол және жеңіл атлетика бөлімі бар спорт мектебі ашылды. Тек 1937 жылы ғана Семей “Динамо” стадионының ресми ашылуы өтті. Спорт алаңы футбол алаңымен, жүгіру жолымен, волейбол және баскетбол алаңдарымен жабдықталды. 100 орындық көрермендерге арналған жаңа трибуна салынды, оның астында спортшыларға арналған киім ауыстыратын бөлмелер орналастырылды.

Ұлы Отан соғысы жылдарында спорттық база басқа қажеттіліктерге берілді. 1950 жылы стадионның қоршауы жөнделіп, 600 орындық қосымша трибуна салынды, сонымен қатар Сталиннің мүсіні орнатылды.

1966 жылы Семей қаласында жаңа “Спартак” стадионы ашылып, негізгі жарыстар Сол жерде өткізіле бастады, ал “Динамо” құқық қорғау органдарының ведомствосына берілді. Алайда, жыл сайын қыста қала тұрғындары коньки тебетін мұз айдыны құйылды.

1986 жылы стадион аумағында ІІБ жеке құрамының жауынгерлік, қызметтік және дене шынықтыру даярлығы кешенін салу туралы шешім қабылданды. Бірақ бір жылдан кейін жоспарлар күрт өзгерді. 1987 жылы әмбебап спорттық-сауықтыру кешенін жобалау және салу туралы хаттамаға қол қойылды. Бірақ жоспарлар сол беті іске асырылмады…..