Дәстүрлі “Мерейлі отбасы” ұлттық байқауының жеңімпаздары Абай облысынан Замзебаевтар отбасы болды, – деп хабарлайды Semeynews.kz.
Отағасы Серікбек Замзебаев қыркүйек айында 73 жасқа толды. Жұбайы Мастура Нұғманқызымен бірге төрт бала мен он немере тәрбиеледі.
1997 жылы тұңғыш немерелері Мұхтар дүниеге келгенде Мастура апай зейнеткерлікке шықты. Бұған дейін ол 27 жыл бойы кітапханада қызмет атқарған. Ол немересіне түрлі ертегілер, бесік жырын айтып, өнерге құлшынысын оятты. Атасы мен әжесі Мұхтардың саналы, тәрбиелі және білімді азамат болып қалыптасуында негізгі себепкер болды. Бүгін Мұхтар-Республикалық Абай, Шәкәрім оқуларының жеңімпазы, Көкбай оқуларының жүлдегері, ШҚО бойынша дарынды балалар кітабына енгізілді, ән айтып КВН қатысатын.
Бүгінде Мұхтар Жезқазғанда металлург болып жұмыс істейді.
2005 жылы тағы бір немересі – Мағжан дүниеге келді. Қазіргі уақытта ол Назарбаев Зияткерлік мектебінің 12-сыныбында оқиды. Жақында ғылыми жобасы үшін Қазақстан Республикасы Білім министрі Асхат Аймағанбетовтың Алғыс хатымен марапатталды.
Өз күшімен домбырада ойнауды үйренді, үш тілде еркін сөйлейді. Тағы бір немересі – 16 жасар Заңғар Көкбай атындағы орта мектепте оқиды. Республикалық Абай, Шәкәрім оқуларының лауреаты. Байқауға ақындандардың 300 өлеңін жатқа айтып қатысты. Мұқағали Мақатаевтың республикалық оқулардың жүлдегері. Ал жақында өткен Республикалық Көкбай оқуларында 1 орынға иеленді.
Ерлі – зайыптылардың айтуынша, балалары мен немерелері олардың басты жетістігі мен мақтанышы.
Semeynews.kz
