Абай облысында орман өртінің алдын алған отбасы марапатталды
Бесқарағай ауданында отбасымен бірге орман өртінің алдын алған Бесқарағай ауылының тұрғындары – Жанболат и Анаргуль Рүстемовтер отбасына алғыс хат пен тұрмыстық техника табысталды, – деп хабарлайды Semeynews.kz.
Абай облысы әкімінің баспасөз қызметінің хабарлауынша, Абай облысының әкімі Нұрлан Ұранхаев және ҚР төтенше жағдайлар вице-министрі Марат Күлдіков облыс аумағында орман өртінің алдын алған азаматтарды және қызметтік міндеттерін адал атқарған өрт сөндірушілерді марапаттады.
Өткен аптада Жанболат Рүстемов отбасымен бірге жекеменшік көлігімен келе жатып, орманнан шыққан түтінді байқайды. Рүстемовтер отбасы бірден тиісті орындарға телефон шалып, отты өздері сөндіре бастады. Канонер филиалының орман өртін сөндіру стансасы мамандары келіп жеткенге дейін, Рүстемовтер отбасы өртті сөндіріп үлгерген болатын.
Орман шетіндегі өртті көріп, қасынан бейжай өтпей, ағаштардың қызыл жалынға оранып, бүкіл алқаптың өртенуіне жол бермеген Рүстемовтар отбасының әрекеті көпке үлгі.
Сондықтан осындай азаматтың ұстанымы жоғары бар тұрғындар барда еліміздің көркейе түсері анық. Абай облысының әкімі Нұрлан Ұранхаев, өз кезегінде, осындай ерлік көрсетіп, елге қызмет жасаған азаматтарға зор алғыс білдірді.
Сондай-ақ Бақыршық әскери-құтқару бөлімшесінің маманы Қуат Байғазиновке облыс әкімінің алғыс хаты жолданды.
Жарма ауданында болған дала өрті кезінде Қуат Байғазинов өрт сөндіруші Айдос Тоқызбаевқа жедел жәрдем мамандары келгенге дейін алғашқы дәрігерлік көмек көрсеткен.
Еске сала кетейік, өткен аптада Президент Қасым-Жомарт Тоқаевтың Қазақстан Республикасының мемлекеттік наградаларымен наградтау туралы жарлығына сәйкес төтенше жағдай кезінде жасаған ерлігі үшін:
Тұрлыбеков Амангелді Айтмұхашұлы – Абай облысы Төтенше жағдайлар департаменті өрт сөндіру және авариялық-құтқару жұмыстары қызметі № 14 өрт сөндіру бөлімінің бөлімше командирі, ІІІ дәрежелі «Айбын» орденімен;
Нұрлан Сәлімжан – Абай облысы Төтенше жағдайлар департаменті өрт сөндіру және авариялық-құтқару жұмыстары қызметі № 14 өрт сөндіру бөлімінің өрт сөндірушісі, «Ерлігі үшін» медалімен марапатталған болатын.
Semeynews.kz
