Шығыс Қазақстан облысының аумағында ағымдағы жылдың 25 сәуірі мен 27 сәуірі аралығында ақпараттық технологияларды пайдалана отырып жасалған құқық бұзушылыққа, оның ішінде интернет-алаяқтығына қарсы күрестің тиімділігін арттыру мақсатында «Контрафакт» мемлекетаралық жедел-профилактикалық іс-шарасы өткізілді.
ЖПІШ аясында ақпараттық жүйелерді пайдалана отырып, интернет-алаяқтық және ұрлық фактілері бойынша тіркелген бұрын жасалған қылмыстық істерді ашу шаралары қабылданды.
«Контрафакт» жедел алдын алу іс-шарасының 3 күндік жұмыс қорытындысы бойынша ШҚО ПД Криминалдық полиция басқармасының қызметкерлері 14 қылмысты анықтады және тіркеді, бұрын жасалған 25 интернет-алаяқтықты әшкереледі, заңсыз контенті бар 40 сайтты бұғаттады.
ЖПІШ барысында криминалдық полиция қызметкерлері Фейсбук және Инстаграмм әлеуметтік желілерін пайдаланып алаяқтықпен айналысқан 28 жастағы облыс тұрғынын ұстады. Ол мақсатты жарнаманы орнату бойынша қызмет көрсетуді сылтауратып, алаяқтық жолмен алдын ала төлем ретінде ақша алған, ақшаны жәбірленушілер оның банк картасына жіберген, қаражат карточкасына түскеннен кейін қаскүнем жәбірленушілермен байланысын тоқтатқан.
Қазіргі таңда аталған факті бойынша ҚР Қылмыстық кодексінің 190-бабы 2-бөлігі – алаяқтық бойынша сотқа дейінгі тергеу амалдары жүргізілуде. Бұл азаматтың осыған ұқсас 30 қылмысқа қатыстылығы анықталуда.
Полиция департаменті барлық шығысқазақстандықтарды қырағы және мұқият болуға шақырады.
Алаяқтардың айла-амалына түспеңіз, алатын қызметіңіздің сенімділігіне көз жеткізбей, интернет арқылы күмәнді сатып алуларға келіспеңіз және алатын қызметтердің нақтылығына көз жеткізбей интернет желілері арқылы мәміле жасамаңыз, Сізге қатысты құқыққа қайшы әрекеттер жасалған жағдайда дереу «102» жедел арнасына хабарлауды сұрайды.
Semeynews.kz
