ШҚО ТЖД баспасөз қызметінің хабарлауынша, ағымдағы жылдың 27 қаңтарында сағат 00:47-де Алтай ауданы Октябрьский кентіндегі жер үйлердің бірінде жиһаз өртенген. Оқиға орнына шұғыл жеткен құтқарушылар көк түтінге оранған жер үйден 42 жастағы ер адам мен 48 жастағы әйелді алып шықты.
Көп ұзамай жалпы ауданы 4 шаршы метрді құраған өрт толықтай сөндірілді. Алдын ала мәлімет бойынша – өрттің шығуына пешті орнату және пайдалану кезінде қауіпсіздік талаптарының сақталмауы себеп болған.
«Ұлан ауданындағы Сағыр ауылында жеке тұрғын үйдің шатыры, терезе мен есік блоктары және жиһазы отқа оранған. Құтқарушылар үй ішінен 2 газ баллонды сыртқа шығарып үлгерді. 100 шаршы метр алаңдағы қызыл жалын сөндірілді», – делінген хабарламада.
Алтай ауданы Зубовск кентінде жер үйде еден, қабырғалардың ағаш бөліктері өртке оранған. Өрттің шығу себебі – отты абайсыз қолдану. Сондай-ақ 27 қаңтарда құтқарушылар Глубокое, Шемонаиха және Ұлан аудандарында жеке тұрғын үйлерде шыққан жалынды ауыздықтады.
Semeynews.kz
