ШҚО ПД баспасөз қызметі мәлім еткендей, ағымдағы жылдың 12 тамызында Алтай аудандық полиция бөлімінің «102» жедел арнасына қала тұрғыны жүгініп, кішкентай ұлының жоғалғанын хабарлаған.
Баланың анасы 3 жасар ұлымен бірге азық-түлік дүкенінде сауда жасап тұрған сәтте, кішкентай бала көзден таса болған. Дүкеннің маңайын өзі тауып аламақ болып іздеген, алайда іздеу еш нәтиже бермегендіктен полицияға хабарласқан.
Дерей кішкентай баланы іздестіру ұйымдастырылып, нәтижесінде Алтай аудандық полиция бөлімінің ювеналдық полиция тобының кәмелетке толмағандар істері жөніндегі инспекторы полиция капитаны Талғат Сағынғанов үй аулаларының бірінен кішкентай баланы тауып алды.
Т.Сағынғановтың айтуынша, қатты қорыққан бала анасын іздеп жылаған. Баланың денсаулығына еш қауіп төндірмейтініне көз жеткізгеннен кейін, бала анасына жеткізілді. Баласын құшағына басып, көзі жасқа толы ана, полицейге алғысын білдірді.
ШҚО Полиция департаменті, ата-аналарға кішкентай балаларды назардан тыс қалдырмауды ескертеді.
Semeynews.kz
