ШҚО ПД баспасөз қызметінің хабарлауынша, бүгін, Солжағалау полиция бөлімінде жоғалған 14 жастағы қызды іздеуге белсенді қатысқан, сондай-ақ қыз баланың нақтылы қай жерде жүргенін хабарлаған Саян Төлеухановты және Нұрәли Манарбекті марапаттау өтті.
- Жастарыңа қарамай, сендер тыс қалмай көмекке ұмтылдыңдар. Полицейлермен және еріктілермен бірге сендер 14 жасар қыз баланы бірнеше күн іздедіңдер. Немқұрайлылық танытпай қол ұштарыңды бергендеріңе рахмет, ал ата-аналарыңа осындай ұлдарды тәрбиелеп өсіргендеріне алғысымды білдіремін, – деді кездесуде Солжағалау полиция бөлімінің бастығы Ринат Шибұтов.
Алғыс белгісі ретінде полиция подполковнигі Ринат Шибұтов грамота және сыйлық табыстады.
Semey News
