ҚоғамСемейТОП
Қаланы бес бөлікке бөлу – Семей әкімі қыстағы жол тазалау мәселесі туралы
Семей қаласының әкімі Бақытжан Байахметов жылыту маусымына дайындық жөніндегі штаб отырысында қысқы мерзімде қала жолдарын қамтамасыз ететін коммуналдық мекемелердің жұмысына ерекше назар аударуға шақырды, деп хабарлайды Semey News.
- Тәжірибе көрсеткендей, бірінші қар жауғанда бәрі кептеліп, үшінші қар жауғанда қаламыздың жолдарында іздер қалыптасады. Олар қатып, еріген уақытта су басады. Бұның барлығы мердігер мекемелерде техниканың жетіспеуінен. Сондықтан сіздерден, тек бір ұйымда ғана емес, жалпы қалада қанша қар тазалайтын техникалар бар екенін анықтауларыңызды сұраймын,- деді Б.Байахметов.
Қала басшысы қыс мерзімінде Семей жолдарын тазалау бойынша жеке конкурс өткізу қажеттігін атап өтті. Б.Байахметов қаланы бес бөлікке бөліп, әрқайсысы бойынша жеке ұйымды бекітуді ұсынды.
- Қазір істейтін схемаларыңыз жұмыс істемейтін болады. Барлығы қатысады. Қаланы беске бөліп, әр бөлікке жеке ұйым жауап беретін болады. Яғни, қар жауған бетте қала көшелеріне щеткалы техникалар шығады, қажет болған жағдайда грейдерлер шығарылады. Ал содан кейін жол жиегіндегі қарды шығарумен айналысады. Осы мақсатқа бөлінетін қаражатты келесі сессия отырысында қарастырамыз. Шамамен 200 млн теңге. Менің ойымша, жыл соңына дейін бұл жеткілікті. Қалған қаражат келесі жылға қалтырылады. Резервтерімізді қарастырып, барлығын тартып көрейік. Сонда біздің қаламыз таза, ал біздің бригадаларымыз мобильді болады деп ойлаймын, – деп көрсетті қала басшысы.
Отырыс соңында Бақытжан Байахметов қысқа дайындықты қазірден бастау керек екенін тағыда атап өтті.
Semey News
