Абай облысында биыл орманды қорғауға жаңа буындағы тікұшақтар тартылды
Абай облысында биылғы өрт қауіпті маусымының қорытындылары шығарылып, табиғи өрттердің саны артқаны атап өтілді. Өрттердің басым бөлігі найзағайдың әсерінен орын алған.
Абай облысының өңірлік коммуникациялар қызметі алаңында өткен баспасөз мәслихатында орман шаруашылығы мен авиация саласының мамандары 2025 жылғы өрт жағдайына қатысты егжей-тегжейлі баяндады.
«Семей орманы» мемлекеттік орман табиғи резерваты» РММ табиғи кешендері мен объектілерін қорғау қызметі бөлімінің басшысы Бауыржан Омаровтың айтуынша, биылғы жылдың орман өрттерінің негізгі себебі найзағай разрядтары.
– Биыл өрт қауіпті маусымның өткен кезеңінде «Семей орманы» мемлекеттік орман қоры аумағында 211 орман өрті тіркелді. Өрттердің жалпы аумағы 1 102 гектардан асты, оның 317,24 гектары – орманды алқап. 39,36 гектар аумақты жоғарғы өрт шарпыды. Сонымен қатар резерват күштері тұрмыстық 54 және дала өрттерінің 55 оқиғасын сөндіруге қосымша тартылды. Өрттердің негізгі себебі – найзағай разрядтары, мұндай жағдайлар 194 рет немесе 92 пайызды құрады. Халықтың салғырттығынан – 2 оқиға, белгісіз себептермен – 10 оқиға тіркелді. Резерват ормандары табиғи өрт қаупінің 1-сыныбына жатады, бұл ағаш-бұта өсімдіктерінің аса тез тұтанғыш екенін көрсетеді. Өрттердің көпшілігі мамыр–шілде айлары аралығында орын алады. Әсіресе қуаң маусымдарда жауынсыз өтетін найзағай жиілеп, өңірдегі өрт жағдайын қиындатады, – деді Бауыржан Омаров.
Өртке жедел әрекет ету үшін резерват материалдық-техникалық базасын күшейтуді жалғастыруда.
– 2025 жылы лизинг қаражаты есебінен 26 шағын орман өрт сөндіру кешені (JAC базасында) және 10 трактор сатып алынды. Барлық техника жеткізілді, тіркеуге қою жұмыстары жүргізіліп жатыр. Сонымен қатар 39 дана АЦ 3,0-40 техникаларын кезең-кезеңімен жеткізу жалғасуда, – деп толықтырды ол.
Спикер өрт ошақтарын анықтауда авиацияның маңызы зор екенін де атап өтті.
– Орман өрттері қызметінің тұрақты штаты – 177 адам, ал өрт қауіпті маусымда уақытша жұмысқа қабылданатындар – 425 адам. Маусым бойы «Қазавияорманқорғау» авиабөлімшесінің Airbus Helicopters H125 маркалы екі тікұшағымен авиапатрульдеу жүргізілді. Олардың көмегімен 86 өрт анықталды, – деді Омаров.
«Қазавияорманқорғау» РМКҚ-нің Бородулиха авиациялық бөлімшесінің бастығы Александр Лебединский авиацияның көмегімен 38 өрттің сөндірілгенін айтты.
– Биыл орманды қорғауға жаңа буындағы тікұшақтар тартылды. Олар бір тоннаға дейін су алатын төгінді құрылғыларымен жабдықталған. 2025 жылғы өрт қауіпті маусымда Бородулиха бөлімшесі қызмет көрсететін аумақта 66 орман өрті тіркеліп, жалпы аумағы 7,006 гектарды құрады. Авиация көмегімен 42 өрт анықталды, оның 38-і авиациялық өрт сөндіру қызметінің күшімен сөндірілді. Маусым ішінде облыстық аумақтық инспекция және орман иелерімен бірлескен 6 авиарейд өткізілді. 27 су төгілді, жалпы көлемі 17,08 тонна. Ірі өрттерге жол берілген жоқ, дегенмен биыл өрт саны рекордтық болды — 210 оқиға тіркелді. Өрттердің негізгі себебі найзағай, – деді Александр Лебединский.
