“Күз 2024” Отан қорғаушыларды салтанатты шығарып салу рәсімі
2024 жылдың күзінде Қазақстан Республикасы Ұлттық қауіпсіздік комитетінің Шекара қызметі Абай облысы бойынша департаменті “Күз 2024” отан қорғаушыларды салтанатты шығарып салу рәсімін ұйымдастырды. Бұл шараның мақсаты – еліміздің шекарасын қорғауға аттанатын жастарға қолдау көрсету және оларды жігерлендіру.
Рәсім Ұлттық ұлан оркестрінің орындауындағы мемлекеттік гимнмен басталды, бұл сәт отаншылдық рухын көтеріп, қатысушылардың жүрегінде патриоттық сезімдерді оятты.
Салтанатты шарада Семей қаласының әкімінің орынбасары Хамзаев Арайбек Аманкельдыевич құттықтау сөзін айтып, жас сарбаздарға табыс тілеп, олардың ел алдындағы жауапкершілігін ерекше атап өтті. ҚР ҰҚК Шекара қызметі Абай облысы бойынша департаменті тәрбиелік, идеологиялық және кадрлық жұмыстар басқармасының бастығы подполковник Чуримбаев Айдын Амангельдыевич ізгі тілектерін жеткізіп, қызметтің маңыздылығын түсіндірді.
Қорғаныс істері департаментінің бастығының орынбасары подполковник Дмитрий Андреевич Жерегя да жас шекарашыларға арнап сөз сөйледі. Ол әскери қызметтің ерлік пен батылдықты талап ететінін, әрбір азаматтың ел қорғаудағы рөлін атап өтті.
“Аналардың жүрегі” сарбаздар аналар кеңесі Республикалық қоғамдық бірлестігінің Абай облысы бойынша өкілі Айнур Баяхметовна ханым да сөз сөйлеп, аналардың ұлдарына деген мақтаныш сезімін білдірді. Мерзімді әскери қызметшілерінің аналары Үмітжан Рамазановна Ахметжанова мен Тоғжан Мәулетбековна Жакасова да жас шекарашыларға ақ жол тілеп, олардың ел қорғаудағы қызметіне сәттілік тіледі.
Шараның соңында мерзімді әскери қызметшілер Рамазанов Нұрғасыр мен Сериккан Мирас шекара қызметіне келгеніне алғыс білдіріп, өздерінің борыштарын адал атқаруға дайын екендіктерін жеткізді.
Бұл іс-шара жастардың патриоттық сезімдерін оятып, еліміздің қауіпсіздігіне үлес қосуға ынталандыру мақсатында ұйымдастырылды. Жас шекарашылардың отан қорғау жолындағы алғашқы қадамдарына сәттілік тілейміз!
