Абай ауданының тұрғындарымен есеп беру кездесуі өтті
Облыс әкімі Нұрлан Ұранхаев Абай ауданы тұрғындары алдында есеп берді. Есеп беру барысында аймақ басшысы жүзеге асырылып жатқан жобаларға тоқталып, атқарылған жұмыстардың нәтижесімен бөлісті. Сонымен қатар, азаматтарды жеке сұрақтары бойынша қабылдады.
«Бірінші жартыжылдықта әлеуметтік-экономикалық дамуда оң динамика байқалды. Негізгі капиталға салынған инвестиция көлемі 178,7 млрд теңгені (76%) құрады. Өнеркәсіпте өндірілген өнім көлемі 895,7 млрд теңгеге жетті. 2028 жылға дейін 21 жобаны жүзеге асыруды жоспарлап отырмыз, нәтижесінде 7 мың жұмыс орны ашылады деп күтілуде. Қазіргі таңда 5 инвестициялық жоба жүзеге асырылып, 1040 жұмыс орны ашылды», – деді облыс әкімі Нұрлан Ұранхаев.
Облыс бойынша су құбыры желілерінің ұзындығы 3220,3 шақырымды құрайды. Осылайша, 46 жобаны жүзеге асыру көзделуде. Биыл 20 елді мекенде қалпына келтіру жұмыстары жүргізілуде. Соның нәтижесінде Абай ауданындағы 10 ауыл сумен қамтамасыз етілді.
Бөрілі ауылына блокті модульдік станса орнатуға 15 млн теңге бөлінді. Жобаны аяқтау ағымдағы жылдың тамыз айына жоспарланған. Қасқабұлақ ауылындағы су желілерін қайта жаңғырту жұмыстары да аяқталуға жақын. Өңірлерді дамытудың 2024-2026 жылдарға арналған кешенді жоспарында Архат, Құндызды, Кеңгірбай би, Медеу ауылдарындағы су желілерін қайта жаңғырту көзделген.
Облыста жалпы ауданы 394,3 мың шаршы метрді құрайтын 45 көппәтерлі және 570 жеке тұрғын үй құрылысы жүргізілуде. Жыл соңына дейін 400 мың шаршы метрден астам үй пайдалануға беріледі.
Облыстағы автомобиль жолдарының жалпы ұзындығы 6,8 мың шақырымды құрайды. 2024 жылы 295,6 шақырым жолға орташа жөндеу жүргізіледі. Биыл Абай ауданындағы жолдарды орташа жөндеуге 4,1 млрд теңге бөлінді.
«Ауылдық денсаулық сақтауды жаңғырту» жалпыұлттық жобасы аясында 2025 жылға дейін 65 алғашқы медициналық-санитарлық көмек көрсету нысаны, оның ішінде Медеу, Орда ауылдарында медициналық пункттер, Саржал ауылында дәрігерлік амбулатория салынуда.
Өңірде жаңа бизнес-идеяларды жүзеге асыру үшін 400 айлық есептік көрсеткіш көлемінде грант бөлу жоспарлануда. Бүгінде 102 грант берілді.
Semeynews.kz
