10 тамызда – Абай күні, Қазақстанда философ, ақын, ағартушы және қазақ жазба әдебиетінің негізін қалаушы Абай Құнанбаевтың туғанына 178 жыл толуын салтанатты түрде атап өтілуде, – деп хабарлайды Semeynews.kz.
Осы мерекеге арналып 2023 жылдың 9 тамыз күні сағат 11:30-да Қалалық орталық кітапханада Абай өңірлік гарнизоны әскери полиция басқармасының қызметкерлері, әлеуметтік қызметкерлер мен №49 орта мектептің «Асыл әже» кеңес мүшелері және кітапхананың тұрақты оқырмандарының қатысуымен «Абайды оқы, таңырқа…» атты әдеби-музыкалық кеш өткізілді.
Шара барысында кітапхана қызметкері қазақ поэзиясының биік шыңы, қазақтың бас ақыны А.Құнанбаевтың жүрек шерімен жазылған туындыларының тағлымы мәңгілік қымбат қазына деп атап өтіп, әлем халқы бас иген дара ақынымызды ұрпақтан – ұрпаққа насихаттап жеткізу біздің парызымыз және 10 тамыз Абай күні болып белгіленуі біздің еліміз үшін де, барша қазақстандықтар үшін де үлкен мақтаныш деп жеткізді.
Шараның жалғасын Қазақстан Журналистер одағының мүшесі, Абай ауданының құрметті азаматы, облыстық ардагерлер кеңесінің төрағасы Әлин Мұрат Сейсенұлы және музей ісінің маманы Тортенова Гүлнұр Шалатайқызы жалғастырып, сөз барысында әр қазақтың баласында Абай атамыз айтқандай «ыстық қайрат, нұрлы ақыл, жылы жүрек» болса ғана үлкен жетістікке жетеміз» – деп оқырмандарға ақынның өлеңдері арқылы ақыл кеңестерін берді.
Ұлы ақын музыка саласында да орасан зор мұра қалдырды – деп «Асыл әже» кеңес мүшелерінің төрайымы Жанат Сембаева жалғастырып, кеңес мүшелерінің орындауындағы «Көзімнің қарасы», «Желсіз түнде жарық ай» атты Абай әндері оқырмандарға ерекше көңіл – күй сыйлады.
Шара соңында «Әлемге танылған Абай» атты кітап көрмесіне қойылған ақын шығармашылығын, Абай дәуірін суреттейтін әдебиеттер мен мерзімді басылымдарға библиографиялық шолу жасалды.
Semeynews.kz
